Արհեստական ինտելեկտի բումը բերեց Թայվանի արտահանման ռեկորդային աճի

Թայվանի արտահանումը սեպտեմբերին աճել է 30,5 տոկոսով՝ հասնելով պատմական առավելագույնին՝ 70,2 միլիարդ դոլարի, հաղորդում է Le Figaro-ն՝ հղում անելով կառավարության տվյալներին։

Աճի հիմնական պատճառը դարձել է արհեստական ինտելեկտի (AI) ոլորտում չիպերի նկատմամբ գլոբալ պահանջարկի կտրուկ բարձրացումը։ Թայվանի տնտեսության նախարարության հաղորդմամբ՝ արտահանման հիմնական բաժինը կազմել են էլեկտրոնային ապրանքները և կապի սարքավորումները, որոնց մեծ մասը նախատեսված է AI տեխնոլոգիաների համար։

Արտահանումը դեպի ԱՄՆ աճել է 40,2 տոկոսով՝ հասնելով 25,3 միլիարդ դոլարի, իսկ դեպի Հարավարևելյան Ասիա՝ 57,5 տոկոսով, մինչև 14,7 միլիարդ դոլար։ Չինաստանն ու Հոնկոնգը նույնպես մեծացրել են գնումները՝ 11,6 տոկոսով։ Նշենք, որ օգոստոսին ԱՄՆ նախագահ Դոնալդ Թրամփը բարձրացրել էր մաքսատուրքերն իր մի շարք առևտրային գործընկերների նկատմամբ, այդ թվում՝ Թայվանի, սակայն դա չի խոչընդոտել կղզու տեխնոլոգիական արտահանման աճին։