Սարկոզին բանտում սկսել է գիրք գրել

Ֆրանսիայի նախկին նախագահ Նիկոլա Սարկոզին, որը պաշտոնը զբաղեցրել է 2007-ից 2012 թվականներին, բանտում իր առաջին օրը սկսել է գիրք գրել, հայտարարել է նրա փաստաբան Ժան-Միշել Դարոյը: Հաղորդում է ՏԱՍՍ-ը։

«Նա մարզանք է արել և սկսել է գրել իր գիրքը», – BFMTV-ն մեջբերել է նախկին նախագահի փաստաբանին։ Նա ասել է, որ պետության նախկին ղեկավարը 9 քառակուսի մետրանոց խցում է։ «Անընդհատ աղմուկ է», – ասել է Դարոյը։

Փաստաբանը հավելել է, որ Սարկոզին կեսօրին հանդիպել է կնոջ՝ Կառլա Բրունիի հետ։ «Բանտում առաջին օրը սարսափելի էր, բայց նա դիմացավ դրան», – ասել է փաստաբանը։

Փարիզի դատարանը սեպտեմբերի 25-ին 70-ամյա Սարկոզիին դատապարտեց հինգ տարվա ազատազրկման՝ կապված նրա՝ 2007 թվականի նախընտրական քարոզարշավի լիբիական ֆինանսավորման հետ։ Հոկտեմբերի 21-ին նա սկսեց իր պատիժը կրել Փարիզի Սանտե բանտում՝ մենախցում։