Հայաստանի առաջատար տուրօպերատորները ներկայացրել են Հորդանանում հանգստի այս տարվա առաջարկը

Հայաստանի առաջաար Hot Tours, Sacvoyage և Geneva Tours տուրիստական օպերատորները «Էրեբունի» բիզնես կենտրոնում ներկայացրել են ձմեռային հանգստի կազմակերպման իրենց առաջարկը: Նշված երեք կազմակերպությունների ղեկավարները հրավիրված մոտ 100 տուրիստական գործակալությունների ներկայացուցիչներին տեղեկացրեցին, որ Հորդանանի ուղղությամբ այս տարի նրանք հանդես են գալու միասնական առաջարկով:

Նրանց խոսքերի համաձայն, տուրօպերատորների միջև ձեռք բերված համաձայնությունը թույլ է տվել Հորդանան մեկնող հայ տուրիստների համար սահմանել այնպիսի սակագներ, որպսիսիք չկան նույնիսկ Ռուսաստանում: «Hot Tours» տուրօպերատորի տնօրեն Մխիթար Մելիք-Շահնազարյանը այս փաստը բացատրեց այն հանգամանքով, որ ներքին շուկայում տուրօպերատորների միջև մրցակցության բացակայությունը հնարավոր է դարձրել հորդանանյան կազմակերպությունների հետ բանակցություններում պնդել համագործակցության սեփական պայմանները: Նա նաև տեղեկացրել է, որ այս տարի Հորդանանում հանգստի 8 օրը Հայաստանի քաղաքացիների համար կարժենա մոտ 1350 ԱՄՆ դոլարին համարժեք դրամ: «Կապված ծառայությունների որակից, հյուրանոցի կարգից և լրացուցիչ հանգամանքներից, այդ գինը, իհարկե, կարող է փոփոխվել»,- ասել է Մխիթար Մելիք-Շահնազարյանը:

Հորդանանյան ուղղության շնորհանդեսի ժամանակ տուրօպերատորները ներկայացրել են այդ երկրում հանգիստը կազմակերպելու մի շարք առավելություններ: Խոսքը վերաբերվում էր ինչպես աստվածաշնչյան մի շարք վայրերում լինելու բացառիկ հնարավորությանը, սպասարկման բարձր որակին, այնպես էլ տուրիստների անվտանգության բարձր երաշխիքներին: Ի տարբերություն տարածաշրջանի այլ երկրների՝ և մասնավորապես Եգիպտոսի, Հորդանանը շատ ավելի հանգիստ և քաղաքական ցնցումներից հեռու երկիր է, նշել են շնորհանդեսի կազմակերպիչները: