ՌԴ ՊՆ-ն ցուցադրել է «Յարս» և «Սինևա» բալիստիկ հրթիռների արձակումը

Ռուսաստանի Պաշտպանության նախարարությունը հրապարակել է տեսանյութեր, որտեղ ցուցադրվում է միջմայրցամաքային բալիստիկ հրթիռների՝ «Յարս» և «Սինևա» փորձնական արձակումը՝ ռազմավարական միջուկային ուժերի ուսումնավարժության ընթացքում։ Տեսանյութերը հրապարակվել են ՊՆ-ի Telegram ալիքում։

Հրապարակված կադրերում երևում է «Յարս» համալիրի հրթիռի արձակումը շարժական կայանից՝ Պլեսեցկի տիեզերակայանից։ Այն հաջողությամբ խոցել է նշանակետերը Կուրայի ռազմադաշտում՝ Կամչատկայում։ Իսկ «Սինևա» հրթիռը արձակել է «Բրյանսկ» ատոմային սուզանավի անձնակազմը՝ Բարենցի ծովի ջրերից։

Բացի այդ, վարժանքին մասնակցել են նաև Տու-95ՄՍ ռազմավարական ռմբակոծիչներ, որոնք իրականացրել են օդից արձակվող թևավոր հրթիռների փորձարկում։ Ավելի վաղ The National Interest-ը նշել էր, որ «Յարս» համակարգերի առկայությունը Մոսկվայի լուրջ վերաբերմունքն է ցուցադրում միջուկային զսպման քաղաքականության նկատմամբ։