Թուրքիան ձգտում է վերականգնել օդային առավելությունը՝ փորձելով գնել արևմտյան կործանիչներ

Թուրքիան ակտիվացրել է բանակցությունները Միացյալ Նահանգների և եվրոպական երկրների հետ՝ նպատակ ունենալով արագորեն ձեռք բերել բարձր տեխնոլոգիական ռազմական ինքնաթիռներ և վերականգնել իր դիրքերը տարածաշրջանում՝ Իսրայելի և Հունաստանի ֆոնին։ Ինչպես հաղորդում է Reuters-ը, Անկարան նախատեսում է գնել մինչև 40 Eurofighter Typhoon, ինչպես նաև ապագայում հասնել ամերիկյան F-35 կործանիչների գնման համաձայնության։

Թուրքիան ներկայումս քննարկում է Մեծ Բրիտանիայի, Գերմանիայի, Իտալիայի և Իսպանիայի հետ, որպեսզի Կատարից և Օմանից ձեռք բերի 12 օգտագործված Typhoon՝ շտապ կարիքները բավարարելու համար, իսկ հետագայում՝ ևս 28 նոր ինքնաթիռ։ Նախագահ Ռեջեփ Թայիփ Էրդողանը նախատեսում է այս օրերին այցելել Քաթար և Օման՝ գործարքի պայմանները հստակեցնելու համար։ Գերմանիան և Բրիտանիան արդեն հայտնել են իրենց աջակցությունը հնարավոր վաճառքին։

Միաժամանակ, Թուրքիան փորձում է նաև վերականգնել մուտքը F-35 ծրագրի մեջ, որի շրջանակից դուրս է մնացել դեռևս 2020-ին՝ ռուսական S-400 համակարգերի գնման պատճառով։ Անկարան և Վաշինգտոնը քննարկում են ԱՄՆ նախագահի հնարավոր ժամանակավոր արտոնությունը (waiver), որը կարող է շրջանցել CAATSA պատժամիջոցները։ Մինչ այդ Թուրքիան շարունակում է զարգացնել սեփական KAAN թաքնված (stealth) կործանիչը, սակայն մասնագետների գնահատմամբ՝ այն դեռ տարիներ կպահանջի, որպեսզի փոխարինի գործող F-16-ներին։