Հայոց ցեղասպանության հուշահամալիրում հիմնանորոգման աշխատանքները շարունակվում են

Հայոց ցեղասպանութան թանգարան-ինստիտուտը հոկտեմբերի 22-ին հաղորդագրություն է տարածել այն մասին, որ Հայոց ցեղասպանության հուշահամալիրում հիմնանորոգման աշխատանքները շարունակվում են։ Հաղորդագրության մեջ ասվում է, որ հոկտեմբերի 21-ին «Արթուր Թարխանյան կենտրոն»-ը  Հայաստանի ճարտարապետների պալատի անդամ-ճարտարապետների անունից տարածել է հայտարարություն այն մասին, թե  հուշարձանի ընթացիկ վերականգնման աշխատանքներն իրականացվում են սխալ ճարտարապետա-ինժեներական  նախագծային լուծումներով, ինչի հետևանքով խաթարվում է հուշարձանի ինժեներա-կառուցվածքային կայությունը և կորում է  հեղինակայաին կերպարն ու արտահայտչականությունը։

«Այդ հայտարարությունը թյուրըմբռնում է առաջացրել շատերի մոտ՝ ստեղծելով տպավորություն, թե Հայաստանի ճարտարապետների պալատը հայտարարություն է տարածել շինարարության դադարեցման մասին, ինչից հետո Ճարտարապետների պալատը հանդես է եկել հայտարարությամբ»,-ասվում է Հայոց ցեղասպանության թանգարան-ինստիտուտոի տարածած գրառման մեջ:

Ճարտարապետների պալատի հայտարարության մեջ ընդգծվում է, որ «Արթուր Թարխանյան կենտրոն»-ը տարածել է հայտարարություն Հայաստանի ճարտարապետների պալատի անունից, որը չի համապատասխանում իրականությանը։

«Պալատի խորհրդում քննարկումների արդյունքում կայացվել է սկզբունքային որոշում՝ ձեռնպահ մնալ հարցի հանրայնացումից՝ համարելով այդ ճանապարհն անարդյունավետ, իսկ մասնագիտական տարակարծությունների քննարկումները շարունակել և, անհրաժեշտության դեպքում, ընդունելի լուծումներ որոնել բացառապես մասնագիտական գործընկերային դաշտում՝ ներգրավելով բոլոր կողմերին։ Եղեռնի հուշարձանի վերանորոգման աշխատանքների վերաբերյալ քննարկումները Հայաստանի ճարտարապետների պալատում սկսվել են հանրային մտահոգությունների վերաբերյալ առաջին իսկ ահազանգերից անմիջապես հետո։ Հուշարձանի տարածքում Պալատի խորհրդի անդամների իրականացրած շրջայցից և նախագծի հեղինակային խմբի հետ հանդիպումից հետո, Պալատի դիմումի հիման վրա հրավիրվել է ՀՀ ԿԳՄՍ նախարարության գիտամեթոդական խորհրդի արտահերթ ընդլայնված նիստ, որին մասնակցել են Պալատի խորհրդի հինգ անդամներ, այդ թվում՝ Անահիտ Թարխանյանը։ Քննարկման արդյունքում որոշվել է շինարարական աշխատանքները ժամանակավորապես դադարեցնել՝ շինհրապարակի պատշաճ կահավորման և աշխատանքների անվտանգության ապահովման նպատակով, ինչպես նաև շարունակել վերականգնման գործընթացը միայն արդեն իսկ մասնակի քանդված երեք մույթերի հատվածում՝ զուգահեռաբար շարունակելով մասնագիտական քննարկումները հուշարձանի ամբողջական վերականգնման ինժեներական լուծումների և մեթոդաբանության վերաբերյալ»,-ասվում է տեքստում և շեշտվում, որ սահմանվել է շինաշխատանքների վարման մշտադիտարկում՝ ԿԳՄՍ նախարարի, Պալատի նախագահի և նախագծի հեղինակային խմբի ներկայացուցչի մասնակցությամբ։

Նշվում է, որ Հայաստանի ճարտարապետների պալատը մշտապես եղել է Հայոց Եղեռնի զոհերի հիշատակին նվիրված հուշահամալիրի պահպանության, վերականգնման և արժանապատիվ վերաբերմունքի հարցերի առաջնագծում։ Պալատը համոզված է, որ նման կարևորության խնդիրները պետք է կարգավորվեն միայն մասնագիտական համագործակցության և փոխադարձ հարգանքի մթնոլորտում և կոչ է անում բոլոր կողմերին ցուցաբերել հավատ, զգոնություն և խոհեմ մոտեցում՝ հանուն հայ ժողովրդի պատմական այս բացառիկ հուշարձանի ամրակայման և պահպանության։

Հայոց ցեղասպանության թանգարան-ինստիտուտի տնօրինությունն էլ իր հերթին խնդրում է թեման լուսաբանող լրագրողներին գալ, տեսնել հիմնանորոգման աշխատանքների ընթացքը, անել նոր կադրեր և հրապարակումների ժամանակ օգտագործել թարմ կադրեր, ինչպես նաև ճշտել հրապարակվող տեղեկությունները՝ նախքան դրանց տարածումը: