Դաղստանում Ուկրաինայի դրոն խոցած տղամարդը եղել է գյուղի փոխղեկը

Դաղստանի Նովոկուլի գյուղում Ուկրաինայի ԶՈւ դրոն խոցած տղամարդը պարզվել է, որ գյուղի փոխղեկ Ռամազան Մագոմեդովն է, գրում է Mash Gor-ը։ Նրա խոսքով՝ երբ նկատել է, որ համագյուղացիները կրակում են օդում թռչող դրոնի ուղղությամբ, ինքն էլ վերցրել է իր «Սայգա» որսորդական կարաբինը և վերջին փամփուշտով խոցել սարքը։

Մագոմեդովը պատմել է, որ դրոնը թռչում էր դեպի գյուղի խանութը, սակայն կրակոցից հետո ընկել է դաշտում՝ առանց վնաս պատճառելու։ Նա ընդգծել է, որ ուրախ է, որ կարողացել է կանխել դրոնի հնարավոր հարվածը։

Դաղստանի ղեկավար Սերգեյ Մելիքովը ավելի վաղ հայտնել էր, որ հոկտեմբերի 22-ի առավոտյան տարածաշրջանի տարածքում մի քանի դրոն է հայտնաբերվել, որոնցից մեկը պայթել է տեղական ձեռնարկության վերևում, ինչի հետևանքով վնասվել են մեքենաներ։