Եվրոպա–Ուկրաինա 12 կետանոց խաղաղության պլան Ռուսաստանի հետ հակամարտության կարգավորման համար

Եվրոպական երկրներն ու Ուկրաինան համատեղ մշակում են 12 կետից բաղկացած խաղաղության պլան, որի նպատակն է կարգավորել հակամարտությունը Ռուսաստանի հետ, գրում է Bloomberg-ը՝ հղում անելով եվրոպացի պաշտոնյաներին։ Նոր առաջարկը նախատեսում է հրադադարի հաստատում, ռազմագերիների փոխանակում և ռուսական ակտիվների աստիճանական ապասառեցում, եթե Մոսկվան մասնակցի Ուկրաինայի վերականգնման գործընթացին։

Ըստ աղբյուրների՝ նախագծում ընդգրկված են նաև Կիևի՝ Եվրամիություն անդամակցության հեռանկարները, արևմտյան անվտանգության երաշխիքները, ինչպես նաև Ռուսաստանի և Ուկրաինայի միջև բանակցություններ՝ նոր միացված տարածքների կառավարման շուրջ։ Բացի այդ, առաջարկվում է ստեղծել Խաղաղության խորհուրդ՝ ԱՄՆ նախագահ Դոնալդ Թրամփի նախագահությամբ, որը կվերահսկի պլանի իրագործումը։

Նոր տարբերակը համեմատաբար մեղմ է նախորդ նախաձեռնությունների համեմատ․ փաստաթղթում այլևս չկա Ուկրաինայի՝ ՆԱՏՕ-ին միանալու դրույթը, ինչպես նաև՝ արևմտյան զորքերի տեղակայման առաջարկը։ Եվրոպացի դիվանագետները ընդգծում են, որ պլանի վերջնական ձևակերպումը դեռ մշակման փուլում է և պետք է համաձայնեցվի Թրամփի վարչակազմի հետ, մինչդեռ Ռուսաստանը շարունակում է պնդել Դոնբասի լիակատար վերահսկողության պահանջը։