Ուկրաինային պետք չէ լիակատար ազատություն տալ․ Ֆինլանդիայի վարչապետ

Ուկրաինային պետք չէ լիակատար ազատություն տալ՝ օգտագործելու այն գումարները, որոնք նա կարող է ստանալ Եվրամիության անտոկոս վարկերից։ Այս մասին հայտարարել է Ֆինլանդիայի վարչապետ Պետերի Օրպոն, փոխանցում է Politico-ն։

Պարբերականի տվյալներով՝ Եվրամիությունում քննարկում է ընթանում, թե ինչ պայմաններ պետք է համայնքը սահմանի վարկի համար, որի գումարը կարող է հասնել 140 մլրդ եվրոյի: Մասնավորապես, Ֆրանսիան հանդես է գալիս այն բանի օգտին, որպեսզի ստիպի Ուկրաինային այդ գումարը ծախսել Եվրոպայում արտադրված զենքի վրա։ Սակայն այլ երկրներ, այդ թվում Շվեդիան, ցանկանում են, որպեսզի Կիևը կարողանա ինքնուրույն ընտրել, թե ինչպես տնօրինել միջոցները։

«Չեմ կարծում, որ լիակատար ազատությունը լավագույն տարբերակն է։ Մենք վարկեր ենք տրամադրում, ուստի մենք պետք է դա անենք Ուկրաինայի հետ սերտ համագործակցությամբ։ Մենք պետք է վստահ լինենք, որ նրանք այդ հսկայական գումարները կօգտագործեն պատասխանատու կերպով», - նշել է Ֆինլանդիայի վարչապետը։ Օրպոն նաև հույս է հայտնել, որ Ուկրաինան կկարողանա «ավելի ու ավելի շատ զենք գնել Եվրոպայից»: Միևնույն ժամանակ, նա խոստովանել է, որ ԵՄ-ն չունի այն բոլոր հնարավորություններն ու զենքերը, որոնք անհրաժեշտ են Կիևին, ուստի նա հանդես է եկել միավորման տրամադրած գումարներով ԱՄՆ-ից անհրաժեշտ սպառազինություն գնելու հնարավորության օգտին: