«Արևմուտքը քանդում է սեփական հիմքերը». Մարիա Զախարովա

ՌԴ ԱԳՆ ներկայացուցիչ Մարիա Զախարովան արձագանքել է Եվրամիության արտաքին քաղաքականության ներկայացուցիչ Կայա Կալլասի խոսքերին՝ կապված Վլադիմիր Պուտինի և Դոնալդ Թրամփի հնարավոր հանդիպման հետ։ Զախարովայի խոսքով՝ Արևմուտքի ներկայացուցիչները, այդ թվում՝ Կալլասը, «իրենց հայտարարություններով քանդում են սեփական հասարակական և քաղաքական համակարգի հիմքերը»։

Զախարովան ընդգծել է, որ Կալլասը նման հայտարարություններ է անում ոչ թե որպես ազգային գործիչ, այլ որպես պաշտոնյա, ով պարտավոր է խոսել ողջ ԵՄ-ի անունից արտաքին քաղաքական հարցերի շուրջ։ Նա հիշեցրել է նաև, որ վերջերս Հունգարիա էր այցելել մեկ այլ երկրի ղեկավար, որը գտնվում է Միջազգային քրեական դատարանի հետաքրքրության շրջանակում, և այդ ժամանակ եվրոպական առաջնորդներն անհարմար էին արտահայտվում հնարավոր ձերբակալության թեմայով։

ՌԴ ԱԳՆ խոսնակը հավելել է, որ նման երկակի մոտեցումները բացահայտում են ԵՄ-ի ներքին հակասությունները և «ցույց են տալիս նրա կառուցվածքային քայքայումը»։ Ավելի վաղ Կայա Կալլասը Պուտին–Թրամփ հանդիպման հավանականությունը անվանել էր «ոչ այնքան հաճելի իրադարձություն»։