Tesla-ն ռիսկի է դիմում՝ դադարեցնելով նոր մոդելների թողարկումը

Tesla ընկերությունը, որը երբեմն համարվում էր էլեկտրամոբիլային հեղափոխության խորհրդանիշ, այսօր կանգնած է լուրջ մարտահրավերի առաջ․ նրա վաճառքները շարունակում են կախված մնալ արդեն հնացած Model 3 և Model Y մոդելներից։ Ինչպես նշում է Reuters-ը, Էլոն Մասքի ղեկավարած ավտոգիգանտը գրեթե երկու տասնամյակ է՝ ամբողջությամբ նոր ավտոմեքենա չի ներկայացրել։

2023-ին թողարկված Cybertruck-ը, որը պետք է դառնար նոր առաջխաղացում, փաստացի տապալվեց՝ վաճառվելով ընդամենը մոտ 16 հազար օրինակ։ Tesla-ն չեղարկել է նաև իր ավելի էժան՝ $25,000 արժողությամբ էլեկտրամոբիլի նախագիծը, փոխարենը թողարկելով պարզեցված Model 3 և Model Y տարբերակներ՝ համապատասխանաբար $37,000 և $40,000 արժեքով։ Նոր «մարդավարի» մեքենաներ ներկայումս չեն նախատեսվում․ ընկերությունը ամբողջ ուշադրությունը կենտրոնացրել է ինքնավար տաքսիների և հումանոիդ ռոբոտների վրա։

Մասնագետները նախազգուշացնում են, որ առանց նոր մոդելների Tesla-ն չի կարողանա պահպանել աճը․ վաճառքները այս տարվա առաջին ինն ամիսներին նվազել են 6%, իսկ շահույթը՝ 37%, հատկապես Թրամփի վարչակազմի մաքսային քաղաքականության և պետական սուբսիդիաների կրճատման հետևանքով։ Մինչ Tesla-ն փորձում է իր մեքենաները ներկայացնել որպես «թարմացվող iPhone-ներ»՝ ծրագրային բարելավումներով, Չինաստանում մրցակից BYD-ը և այլ արտադրողներ նոր մոդելներ են ստեղծում յուրաքանչյուր երկու տարվա ընթացքում, գրեթե կես ծախսով։

Արդյունքում Tesla-ի մոդելային շարքը՝ ընդամենը վեց մեքենայով 2008-ից ի վեր, դարձել է չափազանց սահմանափակ՝ դուրս մնալով ավտոշուկայի լայն հատվածներից, ներառյալ ԱՄՆ-ում ամենաշատ վաճառվող երեք շարքանի SUV-ները։ Վերլուծաբան Գարեթ Նելսոնի խոսքով․ «Չես կարող շարունակել հին մոդելների պորտֆելով։ Ժամանակն աշխատում է նրանց դեմ, և շուտով Tesla-ն կսկսի վճարել դրա գինը»։