Tesla-ի մաքուր շահույթը նվազել է 37%-ով՝ չնայած վաճառքի ռեկորդային աճին

Tesla ընկերությունը հրապարակել է իր 2025 թվականի երրորդ եռամսյակի ֆինանսական հաշվետվությունը, համաձայն որի՝ ընկերության մաքուր շահույթը կրճատվել է 37%-ով՝ հասնելով 1,37 միլիարդ դոլարի, թեև էլեկտրամոբիլների վաճառքը հասել է գրեթե 500 հազար միավորի։

2024 թվականի նույն ժամանակահատվածում Tesla-ի շահույթը կազմել էր 2,17 միլիարդ դոլար, գրում է Bloomberg-ը։ Վերլուծաբանների կարծիքով՝ այս հակասական ցուցանիշը ցույց է տալիս, որ ընկերությունը շարունակում է բախվել լարվածության իր հիմնական՝ ավտոմոբիլային բիզնեսում։ Իրավիճակը սրել է այն հանգամանքը, որ վերջին կոնֆերանսում Էլոն Մասքը գրեթե չի ներկայացրել պլաններ՝ ինչպես վերակենդանացնել վաճառքները շահութաբերության անկումից հետո։

Ըստ CFRA Research-ի ավագ վերլուծաբան Գարեթ Նելսոնի, Tesla-ի կարճաժամկետ հեռանկարը մնում է անորոշ․ ընկերությունը դեռ պետք է ցույց տա, թե ինչ նոր ուղղություններ կարող են դառնալ աճի շարժիչ ուժ։ Վերջին տվյալներով՝ Tesla-ի բաժինը ԵՄ շուկայում շարունակում է նվազել՝ արդեն վեցերորդ ամիս անընդմեջ, երբ Եվրոպայում նոր մեքենաների վաճառքն ընդհանուր առմամբ անկում է գրանցում։