Եվրոպայի Խորհրդի գլխավոր քարտուղարը դիրքորոշում չո՞ւնի

Եվրոպայի Խորհրդի գլխավոր քարտուղար Տուրբիերն Յագլանդը հայտարարել է, որ «դիրքորոշում չունի» Հայոց ցեղասպանության հարցի եւ դրա ժխտումը քրեականացնելու մասին օրենսդրական նախաձեռնությունների վերաբերյալ՝ հաղորդում է «Մեդիամաքս» լրատվական գործակալությունը։ Տուրբիերն Յագլանդն ասել է այս մասին՝ պատասխանելով ԵԽԽՎ-ում հայաստանյան պատվիրակության անդամ Նաիրա Զոհրաբյանի հարցին:

«Որպես Եվրախորհրդի գլխավոր քարտուղար ես չունեմ դիրքորոշում այս առնչությամբ: Չեմ ուզում Կազմակերպության եւ անդամ-պետությունների անունից մեկնաբանել Ֆրանսիայում տեղի ունեցող քննարկումները: Երբ զբաղեցնում էի Նորվեգիայի վարչապետի, ԱԳ նախարարի եւ խորհրդարանի նախագահի պաշտոնները՝ ես միշտ կողմ էի այն դիրքորոշմանը, որ պատմությունը պատմաբանների եւ պատմական գրքերի համար է եւ չէի սատարում պատմական հարցերի շուրջ քաղաքական որոշումների կայացմանը: Գիտեմ, որ Թուրքիայի կառավարությունն առաջարկել էր ստեղծել պատմաբանների հանձնաժողով եւ հայտարարել է, որ կընդունի այդ հանձնաժողովի առաջարկները: Այս հարցի առնչությամբ ես նույնպես դիրքորոշում չունեմ. նման որոշումներ ընդունում են ազգային խորհրդարանները եւ կառավարությունները», - հայտարարել է Եվրախորհրդի գլխավոր քարտուղարը:

Տուրբիերն Յագլանդի այս հայտարարությունը մի փոքր շփոթմունք է առաջացնում. նույն իր խոսքում հայտնելով, որ ինքը դիրքորոշում չունի Հայոց ցեղասպանության հարցի եւ դրա ժխտումը քրեականացնելու մասին օրենսդրական նախաձեռնությունների վերաբերյալ, միևնույն ժամանակ նա հայտարարում է, թե կողմ է եղել «պատմությունը պատմաբանների համար է» թուրքական իշխանությունների առաջ քաշած դիրքորոշմանը։ Սրանից կարելի է միայն ենթադրել, որ Յագլանդը ուղղակի չի ցանկացել բացահայտ կերպով հայտարարել հարցի վերաբերյալ ունեցած իր բացասական կարծիքի մասին։