ՌԴ Կենտրոնական բանկը նշել է՝ վառելիքի գների աճը դարձել է ինֆլյացիայի գլխավոր պատճառներից մեկը

Ռուսաստանի Կենտրոնական բանկը հայտարարել է, որ վառելիքի շեշտակի թանկացումը և մրգա-բանջարեղենային ապրանքների գների բարձրացումը զգալիորեն արագացրել են սեզոնային ինֆլյացիան երկրում։ Այս մասին նշված է կարգավորողի հոկտեմբերյան նիստից հետո հրապարակված հաղորդագրության մեջ։

Բանկի գնահատմամբ՝ սննդամթերքի շուկայում գների փոփոխությունները տարբեր ուղղություններով են ընթանում․ որոշ ապրանքներ շարունակում են թանկանալ, իսկ մյուսների գները նվազում են։ Այդ պատճառով էլ այս հատվածում ինֆլյացիան չի դանդաղում։ Ըստ հաշվարկների՝ երրորդ եռամսյակում սեզոնային ինֆլյացիան աճել է 2 տոկոսային կետով՝ հասնելով 6,4 տոկոսի, մինչդեռ տարեկան ինֆլյացիան հոկտեմբերի 20-ի դրությամբ կազմել է 8,2 տոկոս՝ կրկնակի գերազանցելով բանկի 4 տոկոսի նպատակային շեմը, հայտնում է Lenta.ru-ն։

ԿԲ-ում մտահոգություն են հայտնել նաև բնակչության բարձր ինֆլյացիոն սպասումների կապակցությամբ, որոնք հոկտեմբերին հասել են 12,6 տոկոսի։ Այդ ֆոնին բանկը որոշել է պահպանել զգուշավոր դրամավարկային քաղաքականություն՝ իջեցնելով հիմնական տոկոսադրույքը 17-ից մինչև 16,5 տոկոս։