Գիտնականները հայտնաբերել են երկու հայտնի դեղամիջոց, որոնք կարող են պաշտպանել ուղեղը Ալցհեյմերի հիվանդությունից

ԱՄՆ Ուեյք Ֆորեսթի համալսարանի գիտնականները պարզել են, որ երկու արդեն գոյություն ունեցող դեղամիջոց՝ շաքարախտի բուժման համար օգտագործվող էմպագլիֆլոզինը և ինսուլինային քթի սպրեյը, կարող են կանխել Ալցհեյմերի հիվանդության վաղ փուլերի զարգացումը։ Հետազոտության արդյունքները հրապարակվել են Alzheimer’s & Dementia ամսագրում։

Չորս շաբաթ տևած կլինիկական փորձարկմանը մասնակցել է 47 մարդ՝ 55-ից 85 տարեկան, որոնց մոտ նկատվել են թեթև ճանաչողական խանգարումներ։ Փորձը ցույց է տվել, որ երկու դեղամիջոցներն էլ բարելավում են ուղեղի արյան շրջանառությունը, նվազեցնում բորբոքումը և նպաստում հիշողության ու մտածողական ֆունկցիաների պահպանմանը։

Բացի այդ, էմպագլիֆլոզինը նվազեցրել է նյարդային սպիտակուց tau-ի մակարդակը՝ Ալցհեյմերի հիմնական մարկերներից մեկը, իսկ ինսուլինային սպրեյը բարելավել է ուղեղի տարբեր հատվածների միջև կապը։ Հետազոտության ղեկավար, պրոֆեսոր Սյուզան Քրաֆթը նշել է, որ նյութափոխանակության վերահսկումը կարող է «փոխել հիվանդության ընթացքը»։ Գիտնականները պատրաստվում են սկսել ավելի լայնածավալ փորձարկումներ՝ հաստատելու այս դեղամիջոցների արդյունավետությունը։