Հունգարիան հաստատել է՝ Պուտին-Թրամփ գագաթնաժողովը կայանալու է

Հունգարիայի արտաքին գործերի նախարար Պետեր Սիյյարտոն հայտարարել է, որ Բուդապեշտը ստացել է հաստատում՝ Ռուսաստանի և ԱՄՆ նախագահներ Վլադիմիր Պուտինի և Դոնալդ Թրամփի հանդիպումը կայանալու է։ Այդ մասին նա ասել է The American Conservative-ին տված հարցազրույցում։

Սիյյարտոյի խոսքով՝ կան շատ ուժեր, որոնք շահագրգռված չեն խաղաղության հաստատմամբ․ «Դրանք են եվրոպական առաջնորդները և Ուկրաինան, որոնք իրենց մեդիայի միջոցով տարածում են կեղծ լուրեր, թե գագաթնաժողովը չի կայանալու։ Բայց մենք ստացել ենք հստակ տեղեկատվություն, որ այն կկայանա։ Ես ավելի շատ վստահում եմ Պուտինին և Թրամփին, քան լիբերալ մեդիային»,— նշել է նախարարը։

Նա հավելել է, որ հենց հայտնի դարձավ Բուդապեշտում գագաթնաժողովի կազմակերպման մասին, ակնհայտ դարձավ նաև՝ «շատերը կփորձեն խոչընդոտել» հանդիպմանը։ Ավելի վաղ Կրեմլի խոսնակ Դմիտրի Պեսկովը հերքել էր լուրերը, թե գագաթնաժողովը չեղարկվել է՝ ընդգծելով, որ խոսքը պարզապես ժամկետի փոփոխության մասին է։