Այս օրինագիծը նաև ողջամիտ թուրքերի հաղթանակն էր

Ֆրանսիայի Սենատի կողմից ցեղասպանությունների ժխտումը քրեականացնող օրինագծի հաստատումից հետո լրագրողների հետ հանդիպեց ՀՅԴ Հայ Դատի գրասենյակի պատասխանատու և ներկայացուցիչ Կիրո Մանոյանը։

Նա ասաց, որ օրինագծի հաստատումը ոչ միայն հայության, մարդու իրավունքների, այլև Թուրքիայում ապրող ողջամիտ թուրքերի հաղթանակն է, քանի որ նրանք գիտեն, որ արտասահմանում նման օրինագծերի ընդունումն անհրաժեշտ է երկրի ներսում փոփոխությունների համար։ Բացի այդ, այս ընթացքում ևս մեկ անգամ հաստատվեց, որ Թուրքիան պատրաստ չէ առերեսվելու իր պատմության հետ։

«Սա նաև Թուրքիայի քաղաքականության պարտությունն էր։ Թուրքիան այնքան բարձրացրեց նշաձողը, որ բարձունքից ցած ընկավ։ Նույնիսկ Թուրքիայի արտգործնախարարը չմեկնեց Բրյուսել, որպեսզի հետևի Սենատի քննարկմանը»,- ասաց Կիրո Մանոյանը։ 

Դաշնակցական գործիչը վստահ է, որ Նիկոլա Սարկոզին կստորագրի արդեն հաստատված օրինագիծը, և այն ուժի մեջ կմտնի, սակայն օրինագծի ճակատագիրն այդքանով չի ավարտվելու։ 

«Անշուշտ կլինեն դեպքեր, երբ տարբեր շրջանակներ կփորձեն օրենքը փորձարկումների ենթարկել։ Ինչպես նաև այս գործընթացին կարող է հետևել այն, որ Եվրամիության այլ երկրներ ևս նման օրինագծեր ընդունեն»,- հավելեց Մանոյանը։

Անդրադառնալով շատ շահարկվող տեսակետին, թե Սենատի որոշումը պայմանավորված էր նախընտրական իրավիճակով, Կիրո Մանոյանն ասաց, որ չի կարելի մեկ գործոնով պայմանավորել այդ ամբողջ գործընթացը։ «Պարզ է, որ մի քանի ազդակներ իրենց դերակատարությունն ունեցան։ Այս ամենն արագ կատարելու առումով, իհարկե, սպասվելիք նախագահական ընտրություններն ու դրանցում հայ համայնքի դերակատարումն իր դերն ունեցավ։ Սակայն օրինագիծը պաշտպանողներն ասում էին, որ 2001 թվականի օրենքը կիսատ էր, և այս օրինագիծը եկավ այդ բացը լրացնելու, բազմաթիվ այլ գործոններ էլ կան, ուստի ամեն ինչ միայն ընտրություններով պայմանավորելը ճիշտ չէ»,- շեշտեց Կիրո Մանոյանը։