Bloomberg․ Թրամփի Ռուսաստանի հանդեպ դիրքորոշման կտրուկ փոփոխության պատճառը դարձել է Ռուբիոյի ազդեցությունը

Bloomberg-ը գրում է, որ ԱՄՆ նախագահ Դոնալդ Թրամփի հերթական շրջադարձը Ռուսաստանի և ուկրաինական հակամարտության հարցում պայմանավորված է նրա վարչակազմում աճող ազդեցություն ունեցող պետքարտուղար Մարկո Ռուբիոյի դիրքորոշմամբ։ Ըստ աղբյուրների՝ Ռուբիոն՝ հայտնի որպես Ռուսաստանի նկատմամբ կոշտ դիրքորոշման կողմնակից, դեմ է ցանկացած փոխզիջման Մոսկվայի հետ։

Նույն աղբյուրների փոխանցմամբ՝ Ռուբիոն նույնիսկ չեղարկել է նախատեսված անձնական հանդիպումը Ռուսաստանի ԱԳ նախարար Սերգեյ Լավրովի հետ՝ ազդանշան տալով, որ չի պատրաստվում մեղմացնել դիրքորոշումը։ Բացի այդ, նա աստիճանաբար ուժեղացնում է իր ազդեցությունը Սպիտակ տանը՝ սահմանափակելով նախագահի հատուկ ներկայացուցիչ Սթիվ Ուիթքոֆի դերը։

Ավելի վաղ Վրոցլավի համալսարանի միջազգային հարաբերությունների փորձագետ Մագդալենա Գուրնիցկա-Պարտիկան նշել էր, որ հենց Ռուբիոն կարող էր կանգնած լինել Բուդապեշտում նախատեսված Պուտին-Թրամփ գագաթնաժողովի չեղարկման հետևում՝ մտահոգվելով, որ Թրամփը կարող է կրկնել Գազայի գործարքի սխալը՝ ժամանակավոր պայմանավորվածությունը ներկայացնելով որպես վերջնական խաղաղություն։