Bloomberg․ Մակրոնը կոչ է արել ԵՄ-ին սպառնալ Չինաստանին տնտեսական հակազդման գործիքով

Ֆրանսիայի նախագահ Էմանուել Մակրոնը դիմել է Եվրոպական միության առաջնորդներին՝ առաջարկելով դիտարկել «Տնտեսական հարկադրանքի դեմ պայքարի գործիքի» (Anti-Coercion Instrument, ACI) կիրառումը Չինաստանի նկատմամբ։ Ինչպես հայտնում է Bloomberg-ը, այս նախաձեռնությունը կապված է Պեկինի կողմից հազվագյուտ մետաղների արտահանման վերահսկողության խստացման հետ։

Մակրոնի խոսքով՝ Չինաստանի քայլերը նպատակ ունեն Եվրոպային ստիպել վարել քաղաքականություն, որը շահավետ է Պեկինի համար։ «Մենք տեսնում ենք, թե ինչ ազդեցություն է սա ունենում մեզ վրա, և պետք է պատրաստ լինենք պատասխան տալու»,— նշել է Ֆրանսիայի նախագահը։

Ըստ գործակալության՝ նման սահմանափակումները կարող են լուրջ սպառնալիք դառնալ ԵՄ արդյունաբերության և անվտանգության համար, քանի որ հազվագյուտ մետաղները կենսական նշանակություն ունեն տնտեսության գրեթե բոլոր ոլորտներում՝ էլեկտրամեքենաների մարտկոցներից մինչև պաշտպանական արտադրություն։ Գերմանիայի կանցլեր Ֆրիդրիխ Մերցն էլ հաստատել է, որ հարցը քննարկվել է, սակայն ԵՄ հանձնաժողովը դեռ վերջնական որոշում չի կայացրել։

ACI-ն մինչ այժմ երբեք չի օգտագործվել․ այն ստեղծվել է որպես գործիք՝ կանխելու երրորդ երկրների՝ առևտրային ճնշումը ԵՄ քաղաքական որոշումների վրա։ Այնուամենայնիվ, Bloomberg-ը նշում է, որ Եվրոպան դեռ խուսափում է այսպիսի խիստ քայլերից՝ չցանկանալով սրել հարաբերությունները Չինաստանի հետ։