«Հայ-թուրքական գործընթաց չկա, որ տուժի այս որոշումից». Կիրո Մանոյան

Լրագրողների խնդրանքով Կիրո Մանոյանն անդրադարձավ երեկ Սենատում ցեղասպանությունների ժխտումը քրեականացնող օրինագծին դեմ արտահայտվող սենատորների հիմնական պատճառաբանություններից մեկին, ըստ որի՝ օրինագծի ընդունումը կարող է բացասաբար անդրադառնալ հայ-թուրքական հարաբերությունների կարգավորման գործընթացի վրա։

«Հայ-թուրքական գործընթաց չկա, որ օրինագծի ընդունումն էլ դրա վրա բացասաբար անդրադառնա»,-ասաց Կիրո Մանոյանն ու հավելեց, որ Թուրքիան փորձում է օգտվել արձանագրություններից՝ ինքը ոչինչ չտալով, բայց գործընթաց չկա, քանի որ Թուրքիան իրականում շահագրգռված էլ չէ, որ գործընթաց լինի։ Բանախոսի բառերով՝ «Այժմ նա ստացել է իր ստանալիքի մեծ մասը. և սա նրա համար շատ էլ շահեկան վիճակ է։ Հայաստանն իրոք պետք է իր ստորագրությունները հետ վերցնի և սպասի, մինչև Թուրքիայում լինի մի իշխանություն, որը պատրաստ կլինի Հայաստանի հետ առանց նախապայմանների հարաբերություններին։ Թուրքիան, եթե անգամ ինչ-որ չափով փոխվել է, ապա ոչ այնքան, որ մեզ հանգիստ զգանք»։

Մանոյանն ասաց նաև, որ չի կարծում, թե հայ-թուրքական արձանագրությունները անմիջական կապ ունեն օրինագծի ստորագրման հետ, բայց Հայաստանի հետ հարաբերությունները կարգավորելու հարցում Թուրքիայի ոչ կառուցողական պահվածքն էլ, անշուշտ, իր դերը կատարել է։

Իսկ ինչ վերաբերում է Ֆրանսիայի նկատմամբ Թուրքիայի հնչեցրած սպառնալիքներին, բանախոսն ասաց, որ առաջիկա օրերին կամ գուցե շաբաթներին, անշուշտ, դիվանագիտական հարաբերություններում որոշակի սառեցում կլինի, բայց տնտեսական ոլորտում գրեթե ոչինչ չի փոխվի, գուցե միայն պետական պատվերների մակարդակում, քանի որ Թուրքիայում էլ են գիտակցում, որ ֆրանսիական արտադրանքների բոյկոտումից իրենք էլ են տուժում։