ՌԴ-ում քննարկվել է Պուտինի, Թրամփի և Զելենսկու հնարավոր հանդիպման տարբերակը

Ռուսաստանի Պետդումայի արտաքին հարաբերությունների կոմիտեի նախագահի առաջին տեղակալ Ալեքսեյ Չեպան կարծիք է հայտնել, որ Վլադիմիր Պուտինն ու Դոնալդ Թրամփը կարող են շատ ավելի արագ համաձայնության գալ անձնական հանդիպման շուրջ, քան՝ Զելենսկու մասնակցությամբ եռակողմ ձևաչափով։ Նրա խոսքով՝ Ուկրաինան գտնվում է ՆԱՏՕ-ի եվրոպացի դաշնակիցների ուժեղ ազդեցության տակ, ինչը դժվարացնում է Զելենսկու անկախ մասնակցությունը նման բանակցություններին։

«Ռուսաստանն ու ԱՄՆ-ը այժմ շատ ավելի մոտ են պայմանավորվածության, քան Ուկրաինան։ Ուկրաինայի վրա չափազանց մեծ ճնշում է գործադրվում, և Զելենսկին դժվար թե կարողանա հանդես գալ որպես անկախ կողմ», — նշել է Չեպան «Լենտա.ռու»-ի հետ զրույցում։

Ավելի վաղ Ռուսաստանի ուղղակի ներդրումների հիմնադրամի ղեկավար Կիրիլ Դմիտրիևը հայտնել էր, որ Պուտին–Թրամփ գագաթնաժողովը չի չեղարկվել, այլ պարզապես տեղափոխվել է՝ մանրամասների հստակեցման անհրաժեշտության պատճառով։ Նրա խոսքով՝ Մոսկվան, Վաշինգտոնը և Կիևը մոտ են դիվանագիտական լուծմանը, իսկ Ռուսաստանը ձգտում է ոչ թե ժամանակավոր հրադադարի, այլ վերջնական խաղաղության։