Թաիլանդի թագուհի մայր Սիրիկիտը մահացել է 93 տարեկանում

Թաիլանդի թագուհի մայր Սիրիկիտը՝ ոճի խորհրդանիշ և տասնամյակներով երկրի ամենասիրված հանրային դեմքերից մեկը, մահացել է 93 տարեկանում։ Թագավորական պալատը հայտնել է, որ նա երկար տարիներ բուժման տակ էր՝ 2012-ի ինսուլտից հետո հազվադեպ հայտնվելով հանրության առաջ։ Սիրիկիտը մահացել է հոկտեմբերի 24-ին՝ արյան վարակման հետևանքով։ Թագավորական ընտանիքի և պալատի անդամների համար հայտարարվել է մեկ տարվա սուգ, իսկ պետական կառույցները մեկ ամսով կիջեցնեն դրոշները։

Սիրիկիտը, որը 70 տարի թագավորած Բումիբոլ Ադուլյադեջի կինը և այժմյան թագավոր Մահա Վաջիրալոնգկոռնի մայրըն է, համարվում էր Թաիլանդի ժամանակակից միապետության խորհրդանիշներից մեկը։ Նա հայտնի էր իր դիզայներական ճաշակով՝ համագործակցելով ֆրանսիացի Պիեր Բալմենի հետ և խթանելով թաիլանդական մետաքսագործությունը։ Թագուհին նաև երկար տարիներ ուղեկցել է ամուսնուն գյուղական շրջայցերի ընթացքում՝ նպաստելով աղքատ շրջանների զարգացմանը և ստանալով «մայր ժողովրդի» կոչումը։

Իր քաղաքական ազդեցությամբ Սիրիկիտը երբեմն հայտնվել է հակասական դերում․ 1998-ին կոչ էր արել աջակցել այն ժամանակվա վարչապետ Չուան Լիքպային, իսկ 2008-ին մասնակցել էր հակակառավարական ցույցերի ժամանակ զոհված ցուցարարի հուղարկավորությանը՝ որին մեկնաբանեցին որպես թագավորական համերաշխություն։ Նրա մահը Թաիլանդում ընդունվել է խոր հարգանքով․ իշխանությունները խնդրել են հանրությանը զսպել տոնական միջոցառումները, իսկ մայրաքաղաք Բանգկոկում հազարավոր մարդիկ սև հագուստով հավաքվել են Չուլալոնգկորնի հիվանդանոցի մոտ՝ վերջին հրաժեշտը տալու թագուհի մայր Սիրիկիտին։