«Էրդողանին չեն բռնելու, որովհետև նա դիվանագիտական անձեռնմխելիություն ունի». Կիրո Մանոյան

Հայ Դատի գրասենյակի պատասխանատու Կիրո Մանոյանը համոզվածություն հայտնեց, որ Ֆրանսիայի Սենատի ընդունած օրինագիծը հետ կպահի ատելություն սերմանողներին Հայոց ցեղասպանությունը ժխտելուց, բայց եթե մեկը փորձի լուրջ ուսումնասիրություններ անել և ասել, որ դա ցեղասպանություն չէր, նրա հանդեպ վերաբերմունքը մի փոքր այլ կլինի։ «Օրենքը բավական ընդարձակ է. ավելի հանդուրժող կլինեն, եթե ժխտումը չի եղել այլամերժության հողի վրա»,-ասաց նա։

Անդրադառնալով այն հռետորական հարցին, թե եթե Էրդողանը Ֆրանսիայում ժխտի Հայոց ցեղասպանությունը, ապա նրա՞ն էլ է նույն պատիժն սպասվում, Կիրո Մանոյանը կատակով ասաց. «Էրդողանին չեն բռնելու, որովհետև նա դիվանագիտական անձեռնմխելիություն ունի»։

Իսկ այն հարցին, թե կարո՞ղ է սա նախադեպ և օրինակ դառնալ եվրոպական մյուս պետությունների համար, բանախոսը պատասխանեց. «Եվրոպական մի քանի երկրներ Ֆրանսիայից առաջ էլ նման օրինագծեր ընդունել էին, բայց այդքան աղմուկ չբարձրացավ։ Խոսքը Շվեյցարիայի և Սլովակիայի մասին է։ Իսկ ինչ վերաբերում է շրջանառվող լուրերին, որ Գերմանիան ևս կարող է հետևել Ֆրանսիայի օրինակին, ասեմ, որ Գերմանիայի Բունդեսթագի կողմից Հայոց ցեղասպանության ճանաչումը յուրահատուկ է, քանի որ իրենց մեղսակցությունն էլ են ընդունում։ Գերմանիայում Հոլոքոստի ժխտումը քրեականացված է, ուստի չեմ զարմանա, եթե Հայոց ցեղասպանության համար էլ նման օրենք ընդունվի»։

Բանախոսը նաև ասաց, որ կարելի է ասել՝ Թուրքիայի՝ Եվրամիությանն անդամակցությունն արդեն սառեցված է, իրականում գործընթաց չկա։ Մանավանդ որ Թուրքիային դժվար դուր գա Սարկոզիի առաջարկած տարբերակը՝ յուրահատուկ հարաբերություններ, բայց ոչ անդամություն։