Ադրբեջանը հրաժարվել է մասնակցել Երևանում «Եվրանեսթ» խորհրդարանական վեհաժողովի 12-րդ լիագումար նիստին

Ադրբեջանի խորհրդարանական պատվիրակությունը չի մասնակցի «Եվրանեսթ» խորհրդարանական վեհաժողովի 12-րդ լիագումար նիստին, որը տեղի կունենա հոկտեմբերի 28-ից 30-ը Երևանում։

Այս մասին APA-ին հայտնել է Եվրանեսթում ադրբեջանական պատվիրակության ղեկավար Թահիր Միրկիշիլին։

Նրա խոսքով՝ Եվրախորհրդարանի փաստաթղթերն ու հայտարարությունները, որոնք կազմում են «Եվրանեսթ» ԽՎ-ի գործունեության մի մասը, հակասում են «Ադրբեջանի ինքնիշխանությանը և տարածքային ամբողջականությանը»։

«Ես կցանկանայի նշել, որ այս որոշումը կապված չէ այն փաստի հետ, որ միջոցառումն անցկացվում է Հայաստանում: Այսօր Ադրբեջանի և Հայաստանի միջև խաղաղությունն արդեն իսկ ապահովված է, և գործնական քայլեր են ձեռնարկվում հարաբերությունները կարգավորելու համար»,– նշել է նա:

Ավելի վաղ հայտնել էին, որ Վրաստանը հրաժարվել է «Եվրանեսթի» խորհրդարանական վեհաժողովի 12-րդ լիագումար նստաշրջանի մասնակցությունից։