Պուտինը դադարեցրել է Պլուտոնիումի ոչնչացման վերաբերյալ ԱՄՆ-ի հետ համաձայնագրի գործողությունը

Ռուսաստանի նախագահ Վլադիմիր Պուտինը ստորագրել է օրենք՝ ԱՄՆ-ի հետ Պլուտոնիումի ոչնչացման վերաբերյալ համաձայնագրի և դրա հավելվածների դենոնսացման (չեղարկման) մասին։ Փաստաթուղթը հրապարակվել է հոկտեմբերի 27-ին իրավական տեղեկատվության պաշտոնական պորտալում։

Խոսքը վերաբերում է 2000 թվականի օգոստոսին Մոսկվայում և սեպտեմբերին Վաշինգտոնում ստորագրված համաձայնագրին, որը նախատեսում էր երկու երկրներում 34 տոննա ռազմական պլուտոնիումի վերամշակում։ Օրենքում նշվում է․ «Դենոնսացնել Ռուսաստանի և ԱՄՆ կառավարությունների միջև կնքված համաձայնագիրը, որը վերաբերում է պաշտպանական նպատակների համար ավելորդ դարձած պլուտոնիումի ոչնչացմանը»։

Հիշեցնենք, որ համաձայնագրի իրականացումը դադարեցվել էր դեռևս 2016 թվականին։ Պետդումայի էներգետիկայի կոմիտեի փոխնախագահ Յուրի Ստանկևիչի խոսքով՝ պատճառներից են ԱՄՆ-ի կողմից Ռուսաստանի դեմ սահմանված պատժամիջոցները և պլուտոնիումի վերամշակման պայմանների միակողմանի փոփոխման փորձերը, գրում է Lenta.ru-ն։