Պուտինը ստորագրել է օրենք՝ ծնունդով քաղաքացիության էլեկտրոնային ձևակերպման մասին

Ռուսաստանի նախագահ Վլադիմիր Պուտինը ստորագրել է օրենք, որով ծնունդով քաղաքացիություն ձևակերպելու գործընթացը դառնում է ավելի հեշտ և հասանելի՝ հնարավորություն տալով դիմումները ներկայացնել առցանց եղանակով։ Փաստաթուղթը հրապարակվել է իրավական ակտերի պաշտոնական կայքում։

Մինչ այս, երեխայի օրինական ներկայացուցիչը՝ ծնողը, խնամակալը կամ մանկատան ղեկավարը, կարող էր քաղաքացիության ձևակերպման դիմում ներկայացնել միայն անձամբ՝ Ռուսաստանի ՆԳՆ տարածքային բաժին այցելելով։ Նոր օրենքով այս գործընթացը կարելի է իրականացնել էլեկտրոնային եղանակով՝ առանց անձնական ներկայության, գրում է Lenta.ru-ն։

ՆԳ նախարարությունը կհաստատի դիմումների էլեկտրոնային ընդունման կարգը, իսկ օրենքը ուժի մեջ կմտնի հրապարակման պահից 180 օր անց։ Նախատեսվում է, որ հնարավորությունը հասանելի կլինի նաև հատուկ ռազմական գործողության գոտում ծառայող զինծառայողների ընտանիքների համար։