Էկվադորի նախագահը հայտարարել է՝ իրեն փորձել են թունավորել կոնֆետներով և ջեմով

Էկվադորի նախագահ Դանիել Նոբոան հայտնել է, որ իր նկատմամբ կատարվել է հերթական մահափորձը․ այս անգամ նրան փորձել են թունավորել քիմիական նյութերով լցված շոկոլադե կոնֆետներով և ջեմով։ Ինչպես փոխանցում է CNN-ը, սա արդեն երրորդ փորձն է վերջին մեկ ամսում՝ սպանելու երկրի առաջնորդին։

Նոբոայի խոսքով՝ քաղցրավենիքներում հայտնաբերվել է անսովոր բարձր կոնցենտրացիայով երեք տարբեր քիմիական միացություն, ինչը, ըստ նրա, պատահական չէր կարող լինել։ Նախորդ շաբաթ նրա ավտոշարասյան վրա հարձակում էր տեղի ունեցել՝ քարերով զինված ամբոխի կողմից, իսկ մեքենայի վրա հետագայում հայտնաբերվել էին գնդակի հետքեր։ Մի քանի օր առաջ էլ Նոբոայի ծառայողական մեքենան ենթարկվել էր հարձակումների՝ Մոլոտովի կոկտեյլներով և ինքնաշեն հրթիռներով։

Չնայած պաշտոնական հաղորդագրություններին, մի շարք վերլուծաբաններ կասկածի տակ են դնում մահափորձերի իրականությունը՝ պնդելով, որ նախագահը կարող է փորձել շեղել հասարակության ուշադրությունը երկրի աճող դժգոհությունից։ Այնուամենայնիվ, 37-ամյա Նոբոան՝ աշխարհի ամենաերիտասարդ ընտրված նախագահը, վստահ է, որ այս միջադեպերը կապված են իր խիստ պայքարի հետ թմրաբարոնների և կազմակերպված հանցավորության դեմ։