Հունգարիան կխոչընդոտի ԵՄ-ի՝ ռուսական նավթից և գազից հրաժարվելու ծրագրին․ Սիյարտո

Հունգարիան կարգելափակի Ռուսաստանի դեմ ԵՄ էներգետիկ պատժամիջոցների նոր փաթեթը և Եվրահանձնաժողովի՝ մինչև 2028 թվականը ռուսական նավթից և գազից լիովին հրաժարվելու ծրագիրը։ Այս մասին հայտարարել է արտաքին գործերի և առևտրի նախարար Պետեր Սիյարտոն, որի ելույթը հեռարձակվել է օրենսդիր մարմնի կայքում։

Արտգործնախարարը կտրուկ քննադատել է ներկայիս սահմանափակումները՝ պնդելով, որ դրանք չեն կարողացել հասնել իրենց նպատակներին և վերջ դնել Ուկրաինայում հակամարտությանը։ Միևնույն ժամանակ, նա պնդել է, որ ԵՄ առաջնորդները մտադիր չեն հրաժարվել իրենց ապակառուցողական քաղաքականությունից։

«Նրանք ցանկանում են խաթարել ոչ միայն տնտեսությունը, այլև եվրոպական էներգամատակարարման անվտանգությունը։ Մենք կպայքարենք մինչև վերջ և կօգտագործենք բոլոր առկա քաղաքական և իրավական գործիքները Հունգարիայի էներգամատակարարման անվտանգությունն ապահովելու համար», - ընդգծել է նախարարը։