Չինացի փորձագետ․ «Բուրևեստնիկ»-ը կստիպի ԱՄՆ-ին նվազեցնել օգնությունը Ուկրաինային

Չինացի ռազմական վերլուծաբան Լան Շունչժենը հայտարարել է, որ Ռուսաստանի նոր միջուկային շարժիչով «Բուրևեստնիկ» հրթիռի ստեղծումը կարող է փոխել միջազգային ռազմավարական հավասարակշռությունը և ստիպել ԱՄՆ-ին նվազեցնել Ուկրաինային տրամադրվող ռազմական աջակցությունը։ Նրա խոսքով՝ Մոսկվայի հրապարակային հայտարարությունները նման զինատեսակների մասին մեծացնում են զսպման ազդեցությունը և ստիպում Վաշինգտոնին վերանայել իր քաղաքականությունը՝ կապված երկարաշառավղային զենքի մատակարարումների հետ։

Փորձագետը նաև ընդգծել է, որ «Բուրևեստնիկ»-ի ի հայտ գալը կարող է դառնալ շրջադարձային պահ համաշխարհային սպառազինության ոլորտում։ Շունչժենի կարծիքով՝ մի շարք երկրներ կարող են հետևել Ռուսաստանի օրինակին և սկսել նմանատիպ համակարգերի մշակում՝ սեփական պաշտպանական հնարավորությունները ամրապնդելու նպատակով։

Ավելի վաղ ՌԴ արտգործնախարար Սերգեյ Լավրովը, անդրադառնալով «Բուրևեստնիկ»-ի փորձարկումներին տրված միջազգային արձագանքներին, նշել էր․ «Բոլորը մի տեսակ լռեցին», ակնարկելով, որ նոր հրթիռի փորձարկումը զգալի ազդեցություն է թողել աշխարհաքաղաքական շրջանակներում։