Էմիր Կուստուրիցան հայտարարեց, որ Netflix-ը «աշխարհում ամենավատ երևույթն է»

Սերբիայի լեգենդար ռեժիսոր Էմիր Կուստուրիցան կտրուկ արտահայտվել է ամերիկյան Netflix հարթակի մասին՝ հայտարարելով, որ այն «աշխարհում ամենավատ բանն է, ինչ կարող է լինել»։ Ինչպես փոխանցում է «Пятый канал»-ը, Կուստուրիցան համոզված է, որ հարթակը տեխնոլոգիական մակարդակով հասել է մեծ հաջողությունների, սակայն իր գործունեությունը հիմնված է գաղափարական և քարոզչական ազդեցության վրա։

«Այո, նրանք տեխնոլոգիապես աշխատում են հիանալի, բայց ամբողջը կառուցված է գաղափարական մանիպուլյացիայի վրա», — նշել է ռեժիսորը՝ հավելելով, որ Netflix-ի ազդեցությունը բացասաբար է անդրադառնում համաշխարհային կինոարտադրության որակի վրա։

Ավելի վաղ Կուստուրիցան քննադատել էր ժամանակակից կինեմատոգրաֆը՝ նշելով, որ նոր ֆիլմերից բացակայում է բարոյական հիմքը, իսկ կինոն վերածվել է «գովազդային արտադրանքի»։ Նրա խոսքով՝ ժամանակին գոյություն ուներ հավասարակշռություն՝ Հոլիվուդի և հեղինակային կինոյի միջև, բայց այսօր այն այլևս չկա։