PayPal-ի բաժնետոմսերը թռիչքային աճ են գրանցել ChatGPT-ի հետ համագործակցության ֆոնին

Ամերիկյան վճարային հսկա PayPal-ի բաժնետոմսերը աճել են մինչև 14%, երբ հայտնի դարձավ ընկերության և OpenAI-ի միջև ձեռք բերված պայմանավորվածությունը՝ իր թվային դրամապանակը ինտեգրելու ChatGPT-ի միջավայրում, գրում է CNBC-ն։

Նոր համակարգը թույլ կտա օգտատերերին անմիջապես գնել և վճարել ChatGPT-ի միջոցով գտնված ապրանքների համար, իսկ PayPal-ի առևտրային էկոհամակարգի միացմամբ՝ վաճառողները կկարողանան իրենց ապրանքներն առաջարկել ուղիղ ChatGPT-ում։ Ընկերության գլխավոր տնօրեն Ալեքս Քրիսը նշել է․ «Հարյուրավոր միլիոն PayPal դրամապանակների օգտատերեր այժմ կարող են պարզապես սեղմել «Գնել PayPal-ով» կոճակը և ապահով կերպով կատարել գնումներ»։

Նորությունը խթանել է ներդրողների հետաքրքրությունը․ բաժնետոմսերի գինը հետագայում հաստատվել է շուրջ 11,5% աճի վրա՝ հասնելով 78,31 դոլարի մեկ միավորի դիմաց։ Միևնույն ժամանակ, PayPal-ի զուտ շահույթը 2025-ի երրորդ եռամսյակում աճել է 24%-ով՝ հասնելով 1,25 միլիարդ դոլարի, ինչը ցույց է տալիս ընկերության ֆինանսական կայունությունն ու հաջող ինտեգրումը արհեստական բանականության ոլորտում։