Աշխարհը մոտենում է ռեսուրսների գների կտրուկ անկմանը՝ զգուշացնում է Համաշխարհային բանկը

Համաշխարհային բանկը (ՀԲ) կանխատեսում է, որ 2026 թվականին նավթի և մյուս հումքային ապրանքների գները կընկնեն վերջին վեց տարվա նվազագույն մակարդակին։ «Ապրանքային շուկաների հեռանկարներ» զեկույցում նշվում է, որ պատճառներն են համաշխարհային տնտեսության դանդաղ աճը, նավթի ավելցուկային առաջարկը և քաղաքական անկայունությունը։

Զեկույցի համաձայն՝ նավթի համաշխարհային ավելցուկը մինչև 2026 թվականը կաճի մոտ 65 տոկոսով՝ 2020-ի ցուցանիշների համեմատ։ Միաժամանակ, պահանջարկի աճը դանդաղում է՝ էլեկտրական և հիբրիդային մեքենաների տարածման ու Չինաստանի սպառման նվազման հետևանքով։ ՀԲ-ն կանխատեսում է, որ Brent տեսակի նավթի միջին գինը կընկնի 68 դոլարից (2025թ.) մինչև 60 դոլար (2026թ.), իսկ ընդհանուր էներգակիրների գները երկու տարում կնվազեն շուրջ 22 տոկոսով։

Միևնույն ժամանակ, որոշ մետաղների գները կշարունակեն աճել․ ոսկին կարող է թանկանալ ևս 5 տոկոսով, իսկ արծաթը՝ մոտ 8 տոկոսով։ Սակայն զեկույցը նաև զգուշացնում է, որ աշխարհաքաղաքական լարվածությունը, կլիմայական ծայրահեղությունները և արհեստական բանականության էներգատար զարգացումը կարող են անսպասելիորեն նորից բարձրացնել գները՝ հատկապես նավթի, ալյումինի և պղնձի շուկաներում։