Օրբանը կմեկնի Վաշինգտոն՝ Թրամփի հետ քննարկելու ԱՄՆ–Ռուսաստան գագաթնաժողովն ու էներգետիկ պատժամիջոցների վերացումը

Վենգրիայի վարչապետ Վիկտոր Օրբանը նոյեմբերի 7-ին կմեկնի Վաշինգտոն՝ ԱՄՆ նախագահ Դոնալդ Թրամփի հետ հանդիպման համար։ Քննարկման հիմնական թեմաները կլինեն ԱՄՆ–Ռուսաստան հնարավոր գագաթնաժողովի անցկացումը Բուդապեշտում և Վենգրիայի ազատումը ամերիկյան էներգետիկ պատժամիջոցներից, հայտնել է Օրբանի վարչակազմի ղեկավար Գերգեյ Գույյաշին՝ Reuters-ին։

Գույյաշի խոսքով՝ հանդիպման ընթացքում կողմերը նախատեսում են ստորագրել համագործակցության համաձայնագրեր էներգետիկայի, պաշտպանական արդյունաբերության, տնտեսության և ֆինանսների ոլորտներում։ Նա նշել է, որ հանդիպումը նաև հնարավորություն կտա կողմերին մշակել «ճանապարհային քարտեզ», որը կարող է հանգեցնել ռուս-ամերիկյան երկխոսությանը և, հնարավոր է, ռուս-ուկրաինական խաղաղ համաձայնագրին։

Ավելի վաղ Օրբանը հայտարարել էր, որ մտադիր է Թրամփի հետ քննարկել ռուսական նավթային հատվածի դեմ սահմանված պատժամիջոցները, որոնք նա համարում է սխալ։ Վենգրիան փորձում է գտնել լուծում, քանի որ ԱՄՆ ֆինանսների նախարարությունը վերջերս պատժամիջոցներ էր սահմանել Ռուսաստանի խոշոր նավթային ընկերությունների, այդ թվում՝ «Լուկօյլ»-ի նկատմամբ։