Հարավային Կորեայի ԱԳՆ ղեկավարը զարմացել է Թրամփի՝ Սեուլին ատոմային սուզանավ թույլատրելու որոշումից

Հարավային Կորեայի արտգործնախարար Չո Հյոնը հայտարարել է, որ զարմացել է ԱՄՆ նախագահ Դոնալդ Թրամփի հայտարարությունից, որով նա թույլ է տվել Սեուլին ունենալ սեփական ատոմային սուզանավ։ Նրա խոսքերը փոխանցում է ТАСС-ը։

«Առավոտյան հանկարծ տեսանք նրա հրապարակումը սոցիալական ցանցում, որտեղ նա գրել էր, որ աջակցում է այդ գաղափարին», — ասել է Չո Հյոնը մամուլի ասուլիսի ընթացքում՝ նշելով, որ նման որոշումները սովորաբար պահանջում են երկարատև դիվանագիտական քննարկումներ։

Նախարարը հավելել է, որ առաջիկայում Վաշինգտոնի և Սեուլի ներկայացուցիչները կանցկացնեն աշխատանքային խորհրդակցություններ՝ հստակեցնելու սուզանավերի կառուցման հնարավոր պայմանները։ Ավելի վաղ Թրամփը Truth Social-ում գրել էր, թե տվել է Հարավային Կորեային թույլտվություն «սկսել սեփական ատոմային սուզանավի կառուցումը»։