Բուրևեստնիկի փորձարկումները միջուկային չէին. Կրեմլ

Ռուսաստանի նախագահի մամուլի քարտուղար Դմիտրի Պեսկովը հերքել է Դոնալդ Թրամփի հայտարարությունը, թե Ռուսաստանը կատարում է միջուկային զենքի փորձարկումներ։ Նրա խոսքով՝ եթե ԱՄՆ նախագահը նկատի է ունեցել «Բուրևեստնիկ» հրթիռի փորձարկումները, ապա դրանք ոչ մի կերպ չեն դասվում միջուկային փորձարկումների շարքին։

«Եթե ինչ-որ ձևով խոսքը վերաբերում է “Բուրևեստնիկ”-ի փորձարկմանը, ապա դա միջուկային փորձարկում չէ և երբեք այդպիսին չի եղել», — ասել է Պեսկովը՝ մեկնաբանելով Թրամփի խոսքերը, թե «այլ երկրներ արդեն զբաղվում են միջուկային փորձարկումներով»։

Հիշեցնենք, որ հոկտեմբերի 26-ին նախագահ Վլադիմիր Պուտինը հայտնել էր «Բուրևեստնիկ» թևավոր հրթիռի հաջող փորձարկման մասին՝ այն բնորոշելով որպես «աշխարհում աննախադեպ ռազմատեխնիկական ձեռքբերում»։ Թրամփը, իր հերթին, հայտարարել էր, որ ԱՄՆ-ն սկսելու է սեփական միջուկային փորձարկումները՝ «հավասար պայմաններով մյուս երկրների հետ»։