Թրամփը և Սի Ցզինպինը քննարկել են Ուկրաինան, ռուսական նավթը և միջուկային զենքի սահմանափակումը՝ առանց հստակ արդյունքների

ԱՄՆ նախագահ Դոնալդ Թրամփը Պուսանում կայացած հանդիպման ժամանակ փորձել է համոզել Չինաստանի ղեկավար Սի Ցզինպինին ազդել Ռուսաստանի վրա՝ Ուկրաինայի հակամարտության կարգավորման հարցում, սակայն այդ փորձերը հաջողությամբ չեն պսակվել։ Այդ մասին Lenta.ru-ին ասել է ՌԴ ԳԱԱ Ասիայի ժամանակակից հետազոտությունների ինստիտուտի փորձագետ, տնտեսագիտության թեկնածու Եկատերինա Զակլյազմինսկայան։

Նրա խոսքով՝ Չինաստանը ավելի խորությամբ հասկանում է հակամարտության պատճառները և համոզված է, որ ճնշումը սխալ միջոց է՝ ճգնաժամերի կարգավորման համար։ Զակլյազմինսկայան ընդգծել է, որ բանակցությունների ընթացքում կողմերը չեն հասել հիմնական նպատակներին. չստացվեց ո՛չ համաձայնություն Ուկրաինայի շուրջ, ո՛չ էլ առաջընթաց էներգետիկ ու տնտեսական հարցերում։ Թրամփը, ըստ փորձագետի, բարձրացրել է ռուս-չինական նավթագազային համագործակցության թեման, սակայն Պեկինը ցուցաբերել է զսպված դիրքորոշում։

Հանդիպման մյուս առանցքային թեման եղել է միջուկային զենքի սահմանափակումը։ Թրամփը հանդիպումից հետո հրահանգել է սկսել ԱՄՆ-ի միջուկային փորձարկումները՝ նշելով, որ դրանք կանցկացվեն «հավասար հիմունքներով» մյուս տերությունների հետ։ Զակլյազմինսկայան կարծիք է հայտնել, որ Վաշինգտոնը ցանկանում է ներառել Չինաստանին նոր ՍՆՎ պայմանագրի մեջ, որը կսպառվի 2026-ի սկզբին։ Սակայն Պեկինը շարունակում է հակադրվել այդ գաղափարին։

Փորձագետը նաև նշել է, որ Թրամփի և Սիի երկժամյա հանդիպումը, ինչպես նաև չքննարկված Թայվանի հարցը, վկայում են այն մասին, որ բանակցությունները եղել են ավելի խորհրդանշական, քան գործնական։