Tesla-ի գլխավոր մրցակից BYD-ն հայտարարել է շահույթի 33% անկման մասին

Չինական BYD ընկերության մաքուր շահույթը 2025 թվականի երրորդ եռամսյակում նվազել է 33 տոկոսով՝ հասնելով մոտ 7,82 միլիարդ յուանի (ավելի քան 1,1 միլիարդ դոլար)։ Այս մասին հայտնել է Bloomberg-ը՝ վկայակոչելով ընկերության ֆինանսական հաշվետվությունը։

Եռամսյակի ընթացքում BYD-ն վաճառել է շուրջ 1,15 միլիոն նոր էլեկտրամեքենա, ինչը գրեթե 2 տոկոսով պակաս է, քան նախորդ տարվա նույն ժամանակահատվածում։ Շահույթի անկումը մասնագետները կապում են մրցակիցների՝ Geely Automobile Holdings-ի և Changan Automobile-ի վաճառքների կտրուկ աճի հետ, որոնք աճել են համապատասխանաբար 96 և 84 տոկոսով։

Ագրեսիվ գների պատերազմը, որը տևում է արդեն մի քանի ամիս, BYD-ին ստիպում է պայքարել շուկայի իր առաջատար դիրքը պահպանելու համար։ Ընկերությունը կրճատել է իր վաճառքի նպատակը մինչև 4,6 միլիոն մեքենա 2025 թվականին (նախկինում՝ 5,5 մլն), իսկ սեպտեմբերին զիջել է Չինաստանի ամենավաճառվող ավտոարտադրողի տիտղոսը պետական SAIC Motor Corp-ին։ Ընկերությունը նախատեսում է հաջորդ տարի իր վաճառքների 20 տոկոսը ապահովել արտահանման հաշվին՝ նոր էլեկտրամոդելների շնորհիվ։