Չինաստանում նշել են ուկրաինական ճգնաժամի պատճառը

Ուկրաինայի ճգնաժամի պատճառը վերջին տարիներին Եվրոպայում աճող լարվածությունն է։ Խնդրի լուծումը պետք է տեղի ունենա բանակցությունների միջոցով և հաշվի առնի բոլոր կողմերի շահերը։ Նման կարծիք է հայտնել Վաշինգտոնում ՉԺՀ դիվանագիտական ներկայացուցչության մամուլի քարտուղար Լյու Պենյույը, գրում է Lenta-ն:

«Ուկրաինայի ճգնաժամի վերաբերյալ Չինաստանի դիրքորոշումը հետևողական է և հստակ։ Ուկրաինական ճգնաժամի արմատական պատճառը անվտանգության ոլորտում տարածաշրջանային լարվածությունն է, որն աճում է Եվրոպայում երկար տարիների ընթացքում», - հստակեցրել է պաշտոնյան։

Նրա կարծիքով՝ միայն անվտանգության ոլորտում բոլոր կողմերի օրինական շահերը հաշվի առնելով «կարելի է հասնել այդ խնդրի պատշաճ լուծմանը»: