Սիբիրում մոտ 30 ԱԹՍ քարերով խոցած դաղստանցուն պարգևատրել են խիզախության համար

Դաղստանի բնակիչ Շամիլ Համիդովը, որը Սիբիրում քարերով խոցել էր մոտ 30 անօդաչու թռչող սարք, ստացել է «Խիզախության համար» մեդալ։ Ինչպես փոխանցում է ՌԻԱ Նովոստի-ն, նա օգնել է զինծառայողներին Իրկուտսկի մարզում՝ արգելափակելով բեռնատարներից արձակված անօդաչուները։

Պարգևը Համիդովին հանձնել է անձամբ Դաղստանի ղեկավար Սերգեյ Մելիքովը՝ ընդգծելով, որ «իրական հերոսները ապրում են մեր կողքին»։ Նրա խոսքով՝ Համիդովի վճռական գործողությունների շնորհիվ հաջողվել է վնասազերծել շուրջ երեք տասնյակ անօդաչու, որոնք ծրագրված էին հարձակվելու Ռուսաստանի ռազմաօդային ուժերի ինքնաթիռների վրա։

Հիշեցնենք, որ հունիսի 1-ին Ուկրաինայի զինված ուժերի անօդաչուները հարձակում էին գործել Ռուսաստանի մի քանի շրջանների վրա՝ օգտագործելով բեռնատարներից արձակվող սարքեր։ Սիբիրում տեղացիներն ու վարորդները քարերով էին փորձում խոցել դրանք, իսկ դեպքի տեսագրությունները տարածվել էին համացանցում։ Ավելի վաղ Իրկուտսկի մարզում ևս երեք ոստիկան էին պարգևատրվել՝ անօդաչուների հարձակումը կանխելու համար։