Ստեփանակերտի Վ. Փափազյանի անվ. հայկական դրամատիկական վերածնված թատրոնի առաջնախաղը կարտացոլի արցախյան արարող կյանքի մթնոլորտը

Եկել է երկար սպասված պահը, երբ Ստեփանակերտի Վահրամ Փափազյանի անվան հայկական դրամատիկական վերածնված թատրոնը հնարավորություն ունի իր հավատարիմ հանդիսատեսին, արվեստասերներին և արցախցի հայրենակիցներին հրավիրելու «Արցախյան սիրո հեքիաթ, կամ Արա, պա ստի պեն կինի՞» ներկայացման առաջնախաղին։

Այն տեղի կունենա նոյեմբերի 12-ին, Երևանի պատանի հանդիսատեսի թատրոնի բեմում (Մոսկովյան փողոց, 3): Խորհրդանշական է, որ Ստեփանակերտի թատրոնի երևանյան դեբյուտը կհանդիսանա մի ներկայացում, որը բեմադրվում է պրոֆեսոր Ալեքսանդր Մանասյանի կողմից արցախյան բարբառով գրված պիեսի մոտիվներով: Այն 44-օրյա պատերազմից առաջ թատրոնի վերջին ներկայացումն էր Ստեփանակերտի բեմում։

Ռեժիսոր և թատրոնի գեղարվեստական ​​ղեկավար Ռուզան Խաչատրյանի բեմադրությունը մարդկային զգացմունքների և անկեղծ սիրո միջոցով արտացոլում է արցախյան արարող կյանքի մթնոլորտը: «Արցախյան սիրո հեքիաթը» ներկայացում է, որը նպատակ ունի, թեկուզ միայն մի պահ, հանդիսատեսին վերադարձնելու իր կորցրած հեքիաթը: Մեր հեքիաթը գուցե կախարդական, շքեղ կամ փայլփլուն չէր, բայց այն մերն էր՝ պարզ ու մաքուր, գեղեցիկ ու պայծառ, և ամենակարևորը՝ իրական։ Ներկայացումը բեմադրվում է արցախյան բարբառով՝ իր յուրահատկությամբ և հմայքով», - նշում է ռեժիսորը։

Մյուս կողմից, այս ներկայացումը Հայաստանի մայրաքաղաքի բնակիչներին և հյուրերին հնարավորություն կտա ծանոթանալու արցախյան յուրահատուկ բարբառին, արցախցիների ջերմությանն ու անմիջականությանը։

Ստեփանակերտի Վահրամ Փափազյանի անվան հայկական դրամատիկական թատրոնի վերածննդի հիմքերը դրվել են «ԴԻԱԼՈԳ» հասարակական կազմակերպության և Հայաստանի թատերական գործիչների միության գործընկերության շնորհիվ։ 93-ամյա փառահեղ արցախյան թատրոնը մասնագիտորեն վերակազմավորելուն և դրա գործունեությանը աջակցելուն ուղղված գործընկերությունը ամրագրված է երկու կազմակերպությունների միջև կնքված համագործակցության համաձայնագրով, որը այս տարվա օգոստոսին ստորագրվել է նրանց ղեկավարներ Յուրի Նավոյանի և Հակոբ Ղազանչյանի կողմից։

Արդեն երեք ամիս է, ինչ թատերախումբը, որի կազմում են մինչև երեսուն տարվա բեմական փորձ ունեցող արցախցի դերասաններ, փորձեր է անցկացնում Հայաստանի թատերական գործիչների միության դահլիճում և «Դիալոգ» մշակութային կենտրոնում։ Սրանք այն դերասաններն են, ովքեր իրենց տաղանդով և անմիջական խաղով գերել են հանդիսատեսին Ստեփանակերտի բեմում՝ ներկայացնելով ինչպես հայ, այնպես էլ համաշխարհային դրամատուրգների պիեսներ, ստեղծելով վառ կերպարներ՝ սկսած Օնեգինից մինչև Ռոմեո և Ջուլիետ։

«ԴԻԱԼՈԳ» կազմակերպության համակարգային աջակցության շնորհիվ թատերախմբի գործունեությունը դրված է մնայուն հիմքերի վրա, ինչը թույլ է տալիս թատրոնի գեղարվեստական ​​ղեկավարին և դերասաններին կենտրոնանալ ստեղծագործական գործընթացի վրա և աշխատել  բեմադրությունների որակի վրա։ Ավելին, «ԴԻԱԼՈԳ» կազմակերպության հովանու ներքո այս տարվա սեպտեմբերից Գալյա Նովենցի անվան թատերական դպրոցում գործում է արցախյան դասարան, որը հետագայում թատրոնին թույլ կտա իր կազմը համալրել նոր մասնագետ կադրերով: Թատրոնը նախատեսում է ներկայիս առաջնախաղային  ներկայացումից հետո բեմադրել հայ դասական Մուրացանի «Ռուզան» պիեսը։

Նշենք, որ Ստեփանակերտի Վահրամ Փափազյանի անվան պետական ​​հայկական դրամատիկական թատրոնը հիմնադրվել է 1932 թվականին և մինչև 2023 թվականը իր գործունեության ընթացքում բեմադրել ավելի քան 450 ներկայացում։