Օրեշկին․ Ռուսաստանը այլևս ուշադրություն չի դարձնում Եվրոպայի սահմանափակումներին

Ռուսաստանը չի կենտրոնանում Եվրոպայի՝ իր էներգակիրների ներմուծման սահմանափակումների վրա և ամբողջությամբ վերաուղղում է արտահանումը դեպի այլ շուկաներ։ Այդ մասին ТАСС-ին տված մեկնաբանությունում հայտարարել է ՌԴ նախագահի վարչակազմի ղեկավարի տեղակալ Մաքսիմ Օրեշկինը։

«Այն, ինչ անում է Եվրոպան, իր իսկ խնդիրն է։ Մենք արդեն տեսել ենք նրանց նախկին որոշումների հետևանքները», — ընդգծել է նա՝ նկատի ունենալով ԵՄ-ի էներգետիկ քաղաքականության ձախողումները։ Օրեշկինը հավելել է, որ Ռուսաստանը հիմա զարգացնում է համագործակցությունը Արեւելյան և Հարավային Ասիայի, Մերձավոր Արեւելքի, Աֆրիկայի և Լատինական Ամերիկայի շուկաների հետ, որոնք, ըստ նրա, ապագայում կկազմեն համաշխարհային տնտեսության մեծ մասը։

Հիշեցնենք՝ ԵՄ խորհուրդը հաստատել է ռուսական գազի տարանցման արգելքը՝ սկսած 2026 թվականի հունվարի 1-ից, իսկ ռուսական խողովակաշարային և հեղուկ բնական գազի ամբողջական ներմուծման արգելքը ուժի մեջ կմտնի 2028 թվականին։