Չինաստանը ԱՄՆ-ին կոչ է արել չհատել իր չորս կարմիր գծերը․ Bloomberg

Չինաստանն ԱՄՆ-ին կոչ է արել խուսափել չորս կարմիր գծերը հատելուց՝ առևտրային հրադադարը պահպանելու համար, հաղորդում Է Bloomberg-ը:

Այդպիսիք Պեկինը համարում է Թայվանը, ժողովրդավարությունն ու մարդու իրավունքները, Չինաստանի քաղաքական համակարգը և զարգացման իրավունքը։ ՉԺՀ-ն Թայվանը դիտարկում է որպես իր անջատ նահանգ, որը վաղ թե ուշ հարկ եղած դեպքում ուժով պետք է վերադառնա Չինաստանի կազմ: Վերջին տարիներին ԱՄՆ-ն և Չինաստանը նույնպես տարակարծիք են եղել Հոնկոնգում, Սինցզյան-Ույղուրական ինքնավար շրջանում և Տիբեթում մարդու իրավունքների իրավիճակի վերաբերյալ:

«Բացի այդ, ամերիկացի պաշտոնյաները, այդ թվում՝ ֆինանսների նախարար Սքոթ Բեսենտը, կոչ են արել Չինաստանին տնտեսության հավասարակշռությունը տեղափոխել ներքին սպառման ուղղությամբ՝ չինական արտահանման հետևանքով առևտրի զգալի անհավասարակշռության ֆոնին», - պարզաբանել Է Bloomberg-ը:

«Ամենակարևորը միմյանց հիմնական շահերը և հիմնական խնդիրները հարգելն է», - ասել է ԱՄՆ-ում Չինաստանի դեսպան Սե Ֆենգը: Նրա խոսքով՝ «հրատապ առաջնահերթություն» է Չինաստանի առաջնորդ Սի Ծինփինի, ԱՄՆ նախագահ Դոնալդ Թրամփի և նրանց պաշտոնյաների միջև ձեռք բերված կոնսենսուսի իրականացումը, որպեսզի «համոզեն ինչպես մեր երկրներին, այնպես էլ համաշխարհային տնտեսությանը կոնկրետ գործողություններով և արդյունքներով»: