Շոյգուն Մոսկվայում հանդիպում կանցկացնի Հայաստանի և Ադրբեջանի գործընկերների հետ

ԱՊՀ անդամ պետությունների անվտանգության խորհուրդների քարտուղարների 13-րդ նիստի ուշադրության կենտրոնում կլինեն ԱՊՀ-ին սպառնացող վտանգները, դրանց արձագանքման միջոցառումները և Արևմուտքի գաղափարախոսական էքսպանսիային հակազդելը։ Այս մասին հաղորդում է ՏԱՍՍ-ը։

Այն տեղի կունենա նոյեմբերի 5-ին՝ Մոսկվայում, Ռուսաստանի Անվտանգության խորհրդի քարտուղար Սերգեյ Շոյգուի նախագահությամբ, ով նաև առանձին երկկողմ հանդիպումներ կունենա Ադրբեջանի, Հայաստանի և Բելառուսի իր գործընկերների հետ։

ԱԽ մամուլի ծառայությունից ՏԱՍՍ-ին հայտնել են, որ նիստում նախատեսվում է քննարկել «ԱՊՀ-ում անվտանգությանը սպառնացող մարտահրավերներն ու սպառնալիքները, ինչպես նաև համատեղ արձագանքման հնարավոր միջոցառումները»։ Ինչպես նախկինում ՏԱՍՍ-ին ասել է Ռուսաստանի Անվտանգության խորհրդի քարտուղարի տեղակալ Ալեքսեյ Շևցովը, նիստում կքննարկվեն նաև մարդասիրական համագործակցությունը և Արևմուտքի գաղափարախոսական էքսպանսիային հակազդելը։

Շոյգուն ընդգծել է, որ ԱԽ քարտուղարների նիստը «վստահության վրա հիմնված հաղորդակցության իսկապես եզակի ձևաչափ է, որը թույլ է տալիս մեզ ոչ միայն բաց և կառուցողականորեն քննարկել անվտանգության օրակարգի ամենաբարդ հարցերը, այլև համատեղ մշակել երկրներին և ժողովուրդներին արտաքին և ներքին սպառնալիքներից պաշտպանելու լուծումներ՝ հիմնվելով ավանդական ընդհանուր արժեքների ամուր հիմքի վրա»։