Սպիտակ Տունը դատապարտել է Մորսիի հակասեմական կոչերը

Սպիտակ Տունը դատապարտել է Եգիպտոսի նախագահ Մոհամեդ Մորսիի հակասեմական կոչերը: Հիշեցնենք, որ Մորսին հրեաներին անվանել էր «կապիկների և խոզերի ժառանգներ»: Այս մասին նշել է Daily Mail անգլիական պարբերականը:

Մորսին նաև կոչ է արել եգիպտացիներին իրենց երեխաների և թոռների մոտ հրեաների հանդեպ ատելություն սերմանել: Նա նաև ավելացրել է, որ հրեաները արնախումներ են, որոնք հարձակվում են պաղեստինցիների վրա: Այս հայտարարություները կատարվել էին երեք տարի առաջ, սակայն նոր են հրապարակվել: 

Սպիտակ տան խոսնակ Ջեյ Քարնին նշել է, որ «արտահայտությունները խիստ վիրավորական են եղել: Մենք խստորեն դատապարտում ենք յուրաքանչյուր հայտարարություն, որոնք կրոնական ատելություն են սերմանում»:

Մորսիի հայտարարությունը և Սպիտակ Տան դատապարտումը լարվածության նոր ալիք է առաջացրել երկու երկրների առանց այն էլ լարված հարաբերություններում: