Tesla-ի խորհուրդը բաժնետերերին. «Կամ վճարեք Մասկին, կամ կորցրեք նրան»

Tesla-ի տնօրենների խորհուրդը բաժնետերերին կանգնեցրել է պատմական ընտրության առաջ՝ հաստատել Էլոն Մասկի համար նախատեսված աննախադեպ $878 միլիարդանոց փոխհատուցման ծրագիրը կամ վտանգել նրա հեռացումը ընկերությունից։ Եթե Մասկին չվճարեն, նա կարող է լքել Tesla-ն՝ իջեցնելով ընկերության բաժնետոմսերի գինը, նշում են վերլուծաբանները։ Այս քայլը, ըստ փորձագետների, իրականում հանրաքվե է՝ արդյոք կորպորատիվ կառավարման դասական կանոնները գործում են աշխարհի ամենահարուստ գործարարի նկատմամբ։

Խորհուրդը պնդում է, որ միայն Մասքը կարող է Tesla-ին վերածել արհեստական բանականությամբ հսկայի՝ իրականացնելով ինքնավար տաքսիների և մարդանման ռոբոտների ծրագրերը։ Եթե նա հասնի բոլոր նպատակներին, Tesla-ի արժեքը կարող է հասնել 8,5 տրիլիոն դոլարի, իսկ Մասկը կդառնա աշխարհի առաջին տրիլիոնատերը։ Սակայն մի շարք խոշոր ներդրողներ, այդ թվում՝ Նորվեգիայի պետական ներդրումային հիմնադրամը և Կալիֆորնիայի հանրային կենսաթոշակային հիմնադրամը, դեմ են այս պլանին՝ այն անվանելով չափազանց ռիսկային և կառավարման սկզբունքներին հակասող։

Մասնագետները նշում են, որ Մասքը փաստացի շանտաժի է ենթարկում սեփական խորհրդին՝ սպառնալով կենտրոնանալ իր այլ նախագծերի վրա, ինչպիսիք են SpaceX, xAI և Neuralink։ Ինչպես ընդգծում է Յելի համալսարանի փորձագետ Գաութամ Մուկունդան, «սա մի մարդ է, ով ինքն իր գլխին է պահել ատրճանակն ու ասում է՝ տվեք ինձ տրիլիոն դոլար»։ Այնուամենայնիվ, Tesla-ի խորհուրդը շարունակում է համոզել բաժնետերերին, որ առանց Մասկի ընկերությունը կկորցնի իր արժեքը՝ ապացուցելով, թե որքան վտանգավոր է մեկ մարդու վրա կառուցված հսկա կայսրությունը։