Ռուսաստանը կասկածի տակ է դրել Սեուլի հայտարարությունը ԿԺԴՀ-ի զինվորների մասին

Ռուսաստանի Դաշնության խորհրդի միջազգային հարցերի կոմիտեի նախագահ Գրիգորի Կարասինը կասկածել է Հարավային Կորեայի կողմից տարածված տեղեկության արժանահավատությանը այն մասին, թե Հյուսիսային Կորեան պատրաստվում է Ռուսաստան ուղարկել հազարավոր զինծառայողներ։ Այս մասին նա հայտնել է Lenta.ru-ին տված հարցազրույցում։

Կարասինը նշել է, որ Սեուլի վերաբերմունքը Փհենյանի նկատմամբ հաճախ «նյարդային և չափազանց կոշտ» է, և նման հայտարարությունները կարող են լինել պարզապես փորձ՝ բարդացնելու ԿԺԴՀ-ի միջազգային դիրքը։ Նա ընդգծել է, որ անհրաժեշտ է պաշտոնական պարզաբանում ստանալ ռազմական և տեխնիկական գերատեսչություններից՝ հասկանալու համար՝ արդյոք տեղեկատվությունն իրական է, թե հերթական շահարկում։

Ռուս պաշտոնյան միաժամանակ ընդգծել է, որ Մոսկվան և Փհենյանը պահպանում են սերտ համագործակցություն ոչ միայն տնտեսական ու կրթական, այլև ռազմական ոլորտում։ «Մենք բարձր ենք գնահատում հյուսիսկորեական ժողովրդի աջակցությունը՝ կապված մեր տարածքային անվտանգության պաշտպանության հարցերի հետ», — հավելել է Կարասինը՝ հիշեցնելով, որ Ռուսաստանի և ԿԺԴՀ-ի գործընկերությունը բազմաշերտ և փոխշահավետ բնույթ ունի։