Ներկայումս շինարարական աշխատանքներ են ընթանում 258 դպրոցում. ԿԳՄՍ նախարարի տեղակալ

Կառավարությունը հավանություն տվեց «Հայաստանի Հանրապետության 2025 թվականի պետական բյուջեի մասին» օրենքում վերաբաշխում, փոփոխություններ և լրացումներ, Հայաստանի Հանրապետության կառավարության 2024 թվականի դեկտեմբերի 27-ի N 2060-Ն որոշման մեջ փոփոխություններ և լրացումներ կատարելու, ինչպես նաև Հայաստանի Հանրապետության կրթության, գիտության, մշակույթի և սպորտի նախարարությանը գումար հատկացնելու մասին որոշման նախագծին:

 

Կրթության, գիտության, մշակույթի և սպորտի նախարարի տեղակալ Արթուր Մարտիրոսյանը նշեց, որ ներկայացվող նախագծով նախատեսվում է 300 դպրոցի և 500 մանկապարտեզի կառուցման, վերակառուցման, նորոգման և գույքով ապահովման ծրագրի պատշաճ կատարման, ինչպես նաև դպրոցների արագ արձագանքման ֆոնդի համալրման և Հայաստանի տարածքային զարգացման հիմնադրամի կարողությունների զարգացման համար 2025 թ. պետբյուջեում կատարել վերաբաշխում 1 մլրդ 854 մլն 791 հազար դրամի չափով, որից 500 մլն-ը՝ Կառավարության պահուստային ֆոնդից:

 

«Պետք է նշեմ, որ Կառավարության՝ պետական բյուջեով 300 դպրոցի և 500 մանկապարտեզի կառուցման, վերակառուցման, նորոգման և գույքով ապահովման ծրագրի ճշտված բյուջեն կազմում է 125.4 մլրդ դրամ: Ծրագրի շրջանակներում հաստատված ցանկերում ներառված օբյեկտներում շինաշխատանքների մեկնարկման, պատշաճ իրականացման, ինչպես նաև ավարտված օբյեկտների գույքով ապահովման նպատակով սույն նախագծով հատկացվում է 1 մլրդ 761 մլն 524 հազար 800 դրամ, որն ուղղվելու է թվով 4 մանկապարտեզի կառուցման, հիմնանորոգման աշխատանքների կազմակերպման նպատակին և թվով 16 մանկապարտեզների գույքով ապահովման նպատակին:

 

300 դպրոցի և 500 մանկապարտեզի այս ծրագրով ցայսօր կառուցման և կապիտալ նորոգման աշխատանքներ են տարվել և տարվում են 357 դպրոցներում: 2026 թվականի բյուջեում այդ նպատակին ուղղված միջոցներն էլ ավելի են աճել՝ կազմելով շուրջ 150 մլրդ դրամ, ինչը 51.2 տոկոսով ավելին է, քան այս տարվա ֆինանսավորումը: Իսկ ծրագրի շրջանակներում շինարարական աշխատանքներն արդեն ավարտված են 60 դպրոցում, որոնցից 35-ը՝ կառուցված, 25-ը՝ նորոգված: Ներկայումս շինարարական աշխատանքներ են ընթանում 258 դպրոցում, որոնցից 153-ը՝ կառուցվող, իսկ 105-ը՝ կապիտալ նորոգվող: Եվս 39 դպրոցի շինարարություն կմեկնարկի առաջիկա 3 ամիսների ընթացքում: Մինչև տարեվերջ մենք ակնկալում ենք, որ շահագործման կհանձնենք արդեն իսկ ավարտված 60 դպրոցից բացի ևս 50 դպրոց, մինչև 2026 թվականի սեպտեմբերի 1-ը՝ թվով 151 դպրոց, իսկ մինչև 2026 թվականի  դեկտեմբերի 31-ը՝ ևս 47 կառուցվող դպրոց: Այսինքն՝ ընդհանուր թիվը 2026 թվականի տարեվերջի դրությամբ կկազմի 308 դպրոց, որից 139-ը՝ կառուցված, 169-ը՝ կապիտալ նորոգված: Այստեղ որոշակի մասհանումներ ենք կատարում նաև ՀՏՁՀ-ի կառույցների զարգացմանը: Մինչև տարեվերջ մենք նախատեսում ենք նոր նախագծեր շրջանառել»,- ասաց նախարարի տեղակալը: