Կրեմլում կարծիք են հայտնել, որ Եվրամիությունը կշարունակի սահմանափակումներ կիրառել ռուսների նկատմամբ

Ռուսաստանի նախագահի մամուլի քարտուղար Դմիտրի Պեսկովը ենթադրել է, որ ԵՄ երկրները կշարունակեն Ռուսաստանի քաղաքացիների համար ճանապարհորդության սահմանափակումներ կիրառել, հաղորդում է ՌԻԱ Նովոստին։

«Ցավոք, կարելի է ենթադրել, որ եվրոպացիները որոշ լրացուցիչ սահմանափակումներ կմտցնեն Ռուսաստանի քաղաքացիների համար», - ասել է նա։

Նոյեմբերի 5-ին Politico-ն հաղորդել է, որ ԵՄ-ն նախապատրաստում է Ռուսաստանի քաղաքացիների համար վիզային քաղաքականության հետագա փոփոխություններ։ Բրյուսելը մտադիր է սահմանափակել Շենգենյան երկրներ կանոնավոր ճանապարհորդությունները և խստացնել ԵՄ-ի ներսում ռուսների տեղաշարժի վերահսկողությունը։ Նոր ռեժիմը լրացնում է գործող սահմանափակումները, որոնք աստիճանաբար խստացվել են 2022 թվականից՝ Ուկրաինայում ռազմական հակամարտության սկսվելուց հետո։ Այդ ժամանակ ԵՄ առանձին երկրներ, մասնավորապես Բալթյան երկրները, լիովին արգելել կամ զգալիորեն սահմանափակել են Ռուսաստանի քաղաքացիների մուտքը իրենց տարածքներ։