ՌԴ հետախուզությունը մեղադրում է ՆԱՏՕ-ին՝ Ուկրաինայում արյունալի դիվերսիա կազմակերպելու ծրագրում

Ռուսաստանի արտաքին հետախուզական ծառայությունը (ՍՎՌ) հայտարարել է, որ ՆԱՏՕ-ն կոչ է անում Ուկրաինային կազմակերպել զանգվածային դիվերսիա՝  բազմաթիվ զոհերով, որպեսզի մեղադրանքը բարդեն Ռուսաստանի վրա։ Ըստ ծառայության, Արևմուտքը քննարկում է սցենար, որը հիշեցնում է  2014-ի MH17-ի ավիավթարը, և նույնիսկ դիտարկվում է պատահար Զապորոժիեի ատոմակայանում՝ որպես տեղեկատվական սադրանք։

ՍՎՌ-ի տվյալներով՝ Արևմտյան երկրները փորձում են «փոխել պատերազմի ընթացքը և հասարակական ընկալումը», իսկ դիվերսիան պետք է օգտագործվի որպես վերջին փորձ՝ փրկելու Վլադիմիր Զելենսկու ռեժիմը փլուզումից։ Քաղաքագետ Վլադիմիր Կարասևը նշել է, որ նման գործողությունը պետք է նաև շեղի ուշադրությունը ուկրաինական բանակի պարտություններից։

Ավելի վաղ ՍՎՌ-ի տնօրեն Սերգեյ Նարիշկինը հայտարարել էր, որ Բրիտանիայի հետախուզությունը պատրաստում է նոր դիվերսիաներ Բալթիկ և Սև ծովերում, իսկ ԱԽ քարտուղար Սերգեյ Շոյգուն ընդգծել էր՝ Արևմուտքի բոլոր փորձերը հաղթել Ռուսաստանին ուժով «պատմականորեն դատապարտված են անհաջողության»։