Էրդողանը նամակ է հղել Ալիևին

Թուրքիայի նախագահ Ռեջեփ Թայիփ Էրդողանը շնորհավորական նամակ է հղել իր ադրբեջանցի գործընկեր Իլհամ Ալիևին 44–օրյա պատերազմում «հաղթանակի օրվա» կապակցությամբ։ Ըստ ադրբեջանական ԶԼՄ–ների՝ ուղերձում ասվում է.

«Հուսով եմ, որ այս փառահեղ հաղթանակից հետո խաղաղության գործընթացի շրջանակներում ձեռնարկված կառուցողական քայլերը կհանգեցնեն երկարաժամկետ համաձայնագրի։ Հավատում եմ, որ Կովկասում խաղաղ, կայուն միջավայրը կծառայի ամբողջ տարածաշրջանի բարօրությանը և կբարձրացնի Կովկասի ռազմավարական նշանակությունը համաշխարհային քաղաքականության մեջ»,– նշել է Էրդողանը։

Նա նշել է, որ Ադրբեջանի և Թուրքիայի հարաբերությունները շարունակվում են ամրապնդվել․ «Մեր բարձր մակարդակի հարաբերությունները, որոնք կառուցված են «մեկ ազգ, երկու պետություն» սկզբունքի և եղբայրության մեր անխզելի կապերի վրա, որոնք իրենց ուժը քաղում են մեր ընդհանուր ճակատագրից, այսօր էլ շարունակում են ամրապնդվել, ինչպես անցյալում։

Ամուր հիմքի վրա կառուցված՝ մեր դաշինքը և մեր ցուցաբերած հատուկ համագործակցությունը բոլոր ոլորտներում դարձել են տարածաշրջանային խաղաղության, վստահության և կայունության ամենակարևոր հենասյուներից մեկը»,– նշել է Թուրքիայի նախագահը։